KUCHING: Bisi 1,262 iku nyengkaum ari 187 pegawai kanan enggau 1,075 raban polis kontinjen Sarawak sedia napi penusah bah maya timpuh Monsun Timur Laut (MTL) ti disadang nyadi nyentuk March taun baru.
Kepala Polis Sarawak, Datuk Mancha Ata madah, bemacham kereban udah disedia dikena sebarang maya.
“Sepenyampau 1,335 kereban Polis DiRaja Malaysia (PDRM) nyengkaum 348 kereban darat, 832 kereban tasik/ sungai, 11 kereban langit enggau 144 kereban sukung (kimis, injin api) udah disedia sepanjai timpuh MTL tu,” terang iya.
Mancha mansutka jaku nya ba aum pemberita pengudah aum nyikap diri napi Op Banjir – MTL 2023/2024 di Indu Opis Polis Kontinjen (IPK) Sarawak, ditu tadi.
Sama datai Sapit Kepala Polis Sarawak, Datuk Ibrahim Darus enggau Tuai Unit Pengelikun Dalam Menua enggau Pengelikun Mensia Mayuh IPK Sarawak, Superintendan Nixon Joshua Ali.
