ARTIKEL

160 bansal deka dibuka

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

KUCHING: Sepenyampau 160 bansal bisi disedia ungkup Bazar Ramadan Stutong 2026 ti deka diatur di entepan entukar Palan Komersial Stutong enggau Pasar Komuniti Stutong ti nampung baru penyulut program nya ba taun sebedau tu.

Datuk Bandar Kuching Selatan, Datuk Wee Hong Seng madah, palan ti mujur dipilih nya likun, muntang diakses enggau berurun kelimpah nentu peneleba bazar ti lantang ngagai bala pedaja enggau pengusung.

“Bazar Ramadan deka dibuka sepanjai bulan puasa berengkah ari 19 Februari (Hari Empat) nyentuk 20 March 2026 (Hari Lima),” ku iya.

Wee bejaku munyi nya ba aum pemberita Bazar Ramadan Stutong di Opis Majlis Bandaraya Kuching Selatan (MBKS) ditu, kemari. Iya madah, peminta bedaja ba bazar nya udah dibuka lalu sida ti bisi ati deka bedaja dia patut nganjung peminta sida nitih rintai malin ti udah ditetap.

Pom peminta deka disadung berengkah 22 Disember 2025 maya jam gawa aja di Kaunter Servis Sehenti 9, Balai Bandaraya Kuching Selatan, Jalai Padungan.

“Pom peminta meseti diisi menyana sebedau dianjung ngagai kaunter abis laun pukul 4 lemai kena 6 Januari 2026 lalu peminta ti laun enda dikeibuh,” ku iya nyemetak.

Tampung iya, peminta patut disempulang enggau dokumen sukung nyengkaum siti gambar pasport, chelak kad pengelala enggau setipikit rasmi kus ngatur pemakai.

“Sida mega patut mantaika bukti diri bisi beperesa enggau tuchuk tifoid lalu nya patut digaga sida.

“Dikena nentu akses ti sebela, MBKS nagang laki bini ngembuan lebih ari siti bansal atas nama seduai,” terang iya. Iya madah baru, peminta ti mujur, dipinta mayar suwa taba bansal sepenyampau RM300 ungkup siti bansal sereta bayar deposit RM100.

Ba lansa bukai, iya meransang bala pedagang ngenah pemakai ti kreatif enggau inovatif sereta ngetan standard pemeresi enggau kualiti seriris enggau Bandar Kreatif Gastronomi UNESCO, MBKS.

MBKS deka terus bekerejasama enggau Opis Menteri Dagang Dalam Menua enggau Kos Idup (KPDN) sereta Gerempung Nembiak GEMA nengah Projek MySaveFood Ramadan.

“Ungkup Bazar Ramadan 2026, MBKS nyelinting nambah pengawa nyuman teda pemakai sepenyampau 20 peratus enti dibanding ba taun 2025 bepelasarka asil positif sebedau tu

. “Pemeruan rampa menua terus dikemerat lebuh kitai enda meransang pengempu basal bekena ke polistirena enggau kantung plastik tang patut ngena perengka ulih dikena baru sereta siru ke rampa menua,” ku iya.

BERITA LAIN

PRN Ke-13: GPS bediri ba semua 82 penuduk

KUCHING: Gabungan Parti Sarawak (GPS) deka bediri ba semua 82 iti penuduk Kunsil Nengeri (DUN) Sarawak ba Pengawa Bepilih Nengeri (PRN) Ke-13. Chairman GPS ke

BERITA TERBARU