KUCHING: Rang Undang-Undang (RUU) (Komposisi Dewan Undangan Negeri Sarawak) 2025 dikemendar ba Aum Khas DUN, kemari.
RUU ti dibantaika Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah nya nerima sukung 27 ADUN ti ngambi bagi lebuh bejuraika RUU nya.
RUU nya mantaika perambu nambahka penuduk DUN ari 82 ngagai 99 penuduk pengudah dikemendar ba bacha ti kedua enggau ketiga.
Pengawa bepilih keterubah diatur ba taun 1969 ngemataka DUN Sarawak ngembuan 48 penuduk aja.
Udah nya, penyampau penuduk tu nambah ngagai 56 ba taun 1985 lalu nambah baru ngagai 62 penuduk ba taun 1995.
DUN Sarawak nambah baru ngagai 71 penuduk ba taun 2005 sebedau ditambah kepenudi sekali ngagai 82 penuduk ba taun 2014.
Nengah RUU (Komposisi Dewan Undangan Negeri Sarawak) 2025 tu, DUN Sarawak deka nambah 17 penuduk, lalu deka dibantaika ngagai Komiti Pengawa Bepilih Besai (SPR) ungkup ngatur adan sitak baru nya.
