DHAKA: Ketegal sebilah guntin mengkang dalam perut, siku indu sebana pedis perut pengelama 20 taun.

Bachena Khatun, 55, balat sebana pedis perut pengudah beputung muai batu karang ba Klinik Chuadanga ba taun 2002.

Berapa hari pengudah beputung, Khatun nganjung diri beperesa ba klinik sebaka ketegal pedis perut tang lutur dia madahka nya empas ari pengawa beputung sereta enda ngasuh iya irau.

Enda tepantup ati enggau nya, iya nganjung diri berubat ngagai klinik bukai tang lutur semina meri iya ubat aja.

Nyau betaun udah nya, jelu tupi enggau reta tengkira iya abis dijual dikena berubat penyakit nya.

Urung 20 taun pengudah nya, iya nganjung diri berubat ba sepital lalu bejalaika pengawa x-ray sereta tetemuka sebilah guntin mengkang dalam perut iya.