MIRI: Program Sarawakku Sayang (SKS) 2026 terus nyadi jematan perintah enggau rayat lebuh edisyen Bagi Menua Miri deka diatur ari 24 nyentuk 26 April tu di Stadium Miri.
Pia mega, program tu deka dipenyadi Premier Sarawak, Datuk Patinggi Tan Sri Abang Johari Tun Openg kena Hari Enam, 25 April tu.
Sekretari Perintah Sarawak, Datuk Amar Mohamad Abu Bakar Marzuki madah, program sekali tu ukai semina roadshow tang mega inisiatif strategik negap pengawa ngenatai polisi sereta nentuka rayat mereti ke inisiatif perintah ba renggat baruh.
Ku iya, inisiatif program semampai dikemanah belama nengah sukung ejensi perintah nentuka empas nya nemban agi ngagai rayat.
“Pemadu beguna, rayat nemu enggau ngeleda utai ti dipejalai perintah ngambi kaul entara perintah enggau rayat rat agi sereta penerang bekaul polisi ulih dikenatai nemban agi,” ku iya.
Abu Bakar madah munyi nya ba aum pemberita pengudah bejadi Aum Penyeraris Program SKS Bagi Menua Miri 2026 di Opis Residen Bagi Menua Miri kena Hari Satu.
Edisyen sekali tu disadang richah agi ke alai 20,000 pengusung disadang datai, nambah dibanding urung 16,000 di Limbang sebedau tu lalu mandangka timbal program tu chukup manah enggau ngemantup ati.
Kelimpah aktiviti interaktif, pengusung mega ulih menang mayuh perais narit ati nengah e-peraduan nyengkaum perais besai siti entukar Proton Saga.
Nentuka pejalai lanchar, bas shuttle disedia sepanjai tiga hari program nya lalu mensia mayuh nyengkaum ari endur besemak baka Brunei diperansang datai ngerichah program nya.
Entara aktiviti narit ati iya nya Miri Kitchen ti mandang mayuh pemakai asal seraya meri peluang ngagai pedagang ngelaku produk sereta nambah penatai pemisi.
Ba pekara sama, Abu Bakar mega udah ngabas taba perambu projek ngerawang ba Batang Baram, Kuala Baram ti nyadi inisiatif besai negap pemansang ekonomi enggau maritim Miri.
Sama datai, Sapit Sekretari Perintah Sarawak (Administrasyen), Datuk Felicia Tan, Residen Bagi Menua Miri, Galong Luang sereta tuai opis bekaul. – EDISI UKAS
