ARTIKEL

TERIMA KASIH…Dr Charlie (tiga kanan) nerima tepa pengudah meri licha ngagai bala chalun SPM SMK Balai Ringin apin lama tu tadi.

240 iku chalun SPM ninga licha motivasyen

Facebook
Twitter
LinkedIn
WhatsApp
Telegram

JOM BACA E-PAPER SUARA SARAWAK/ NEW SARAWAK TRIBUNE PERCUMA SEAWAL 2 PAGI SETIAP HARI. KLIK SINI

SERIAN: Sepenyampau 240 iku chalun Sijil Pelajaran Malaysia (SPM) 2026 ari Sekula Sekondari (SMK) Balai Ringin nyereta Program Ngiri Penemu enggau Peransang dikena netapka pengeransing sereta nambahka pengandal sida napi peresa ti deka datai.

Program ti berambaika jaku ‘Satu Restu, Seribu Pengarap: Nanam Penetap Ati, Nyapai Penyulut SPM 2026’ nya mega nerima sukung ari 212 iku apai indai enggau penyaga sereta 31 iku pengajar ti begulai ngemujurka program nya kena 19 November 2026 tu tadi.

BELAJAR MANAH…Dr Charlie (dua kanan) betabi jari enggau bala chalun SPM dikena meri peransang ngagai sida.

Sama bisi datai iya nya Penulung Kanan Administrasyen enggau Akademik, Pengajar Samuel Kruger Andrew Rancheng enggau Penulung Kanan Kokurikulum, Pengajar Saiful Azhar Abu Bakar.

Sekeda batang program iya nya pengawa ngenataika pesan ari Kaunselor Organisasyen Opis Pelajar Pelilih (PPD) Serian, Pengajar Norzaini Dzulkifli ngarika PPD Serian.

Ba pesan nya, iya ngerintaika enam pesan beguna ngagai chalun, nyengkaum netapka selinting, nentuka disiplin nyadi pelasar penyulut, nyaga nama manah diri empu, diri sebilik enggau sekula sereta anang takut napi pemar enggau pemuntan.

Iya mega ngingatka chalun mai nama Serian nengah penyulut, angkunka peluang pelajar, bebendar nyendiaka diri sereta anang muntang putus pengarap lebuh napi peresa.

Pengerami nya mega bisi mantaika licha motivasyen ari Dr. Charlie Dudang ti dikangau Pengajar Ngembing enggau Kaunseling SMK Balai Ringin, Pengajar Lai Nan Jung, ti ngena rambai jaku ‘Ubah Runding, Negap Disiplin, Nempa Jeman Ke Mua’.

Dalam jaku iya, Dr. Charlie ngemeratka pemujur ukai semina ditentuka tirai juru ruang bilik tauka pemujur akademik sebedau tu, tang bepanggai ba ulah, disiplin, penetap ati enggau pengeran individu deka terus ngemanahka diri.

Nengah chara interaktif enggau bekunsika peneleba pengidup, iya mega ngemeratka pelajar nyadi puku ti beguna ungkup jemah ila sereta meransang bala nembiak ngambika enda nguna gaya ekonomi ruang bilik tauka kurang perengkaguna nyadika dalih enda ibuhka pelajar.

Iya mega ngenang pasal pemesai guna penatai sekula, ngatur jam, ulah ti manah enggau kerejasama entara nembiak, apai indai enggau pengajar, seraya ngemeratka pemujur pelajar begunaka komitmen semua raban ti ukai semina tanggungpengawa pengajar aja.

Nyimpul randau nya, semua chalun SPM 2026 dikangau nyebut semaya nyadika kelai komitmen ngagai diri empu, diri sebilik enggau pengidup jemah ila.

Program nya mega dikearap ulih ngerapitka kaul sekula enggau apai indai sereta nempa pengandal enggau pengeransing baru ba chalun nyapai pemutus ti pemadu manah.

BERITA LAIN

Tebing Ai Lawas deka dikemanah

LAWAS: Tebing Ai Lawas ulih dikemansang enggau digaga manah nyadi entara tebing ai pemadu manah rampa ba kandang menua tu nyadi sebagi ari pengawa ngemanahka

Pesakit, pakar ulih bekunsi penerang

MIRI: Pengawa bekenaka pemintar digaga (AI) ba bidang perubat ulih mai pesakit ba Sarawak betemu enggau pakar perubat di Shanghai ngеnа sistem ‘luture online’ dudi

BERITA TERBARU