GEDONG: Bisi 300 iti dekoder MyTV diberi ngagai peranak di sitak Gedong serimbai Taun Ke-3 TVS udah ditumbuh ba menua tu.
Premier Sarawak Datuk Patinggi Tan Sri Abang Johari Tun Openg madah, pengawa meri dekoder pechuma tu endang enggau tuju awakka rayat ulih meda program TVS meruan taja pan jauh ba menua pesisir.
“Tebal agi, peranak ti bulih dekoder tu sida ti enda tebeli, perintah deka meri dekoder ti sama nya ngagai sitak menua pesisir bukai nangkan tu ila.
“Nyema bisi jereki lebih, kitai deka nambah dekoder ngagai raban diselinting ba menua pesisir awakka selampur menua ulih meda program ti dibantai ba TVS,” ku iya.
Abang Johari bejaku munyi nya rambau Program TVS Prihatin TVS (Pengawa Nanam Pun Kayu enggau Nyuaka Dekoder MyTV Serimbai Taun Ke-3 TVS) di Balai Datuk Patinggi Ali di Gedong ditu, tadi.
Ku iya, TVS deka ngaga sereta muka program televisyen ti nitihka jeman diatu awakka ulih seikas enggau televisyen bukai.
Kelimpah ari nya lebuh ba aum pemberita udah nya, Abang Johari madah, pelasar TVS manah dikena ngiga bakat baru dalam dunya seni enggau main asal anak Sarawak.
Ku iya, Sarawak ngembuan pengaya ba main asal laban rayat ditu idup likun sereta beserakup kelimpah pupu raban bansa.
