32 MPN sepenemu Konvensyen PKR dikinsil

KUCHING: Kaunsil Ketuai Nengeri (MPN) Sarawak selubang penemu deka nginsil Kovensyen PKR kena 23 November tu bepelasarka pemutus majoriti.

Nitihka penerang ari MPN, pekara nya diputus pengudah 32 ari 46 kaban komiti MPN sepenemu nginsil aum besai nya.

“Tuju kami sebuat setuju deka nginsil aum besai nya ukai dikena ngemba piak bukai tang ketegal sekeda pekara ti nyadi ti ngerikau penetap penemu lurus gawa enggau demokrasyen dalam parti.

“Kami mega berasai lebu meda ulah sekeda bala ketuai renggat nasional ke enda bebasaka sempekat ti udah ditanggam ngelama tu ke alai Keadilan Sarawak ulih ngasaika otonomi dalam nengeri diri empu,” ku penerang nya.

Aum besai nengeri patut di baruh bidang kuasa nengeri tang pemutus ari indu opis deka neruska aum besai tu enggau terang mandangka sida melakangka peminta majoriti MPN Nengeri sereta ngelanggar sempekat otonomi begulai.

Sida pechaya bisi sekeda piak ngepunka pengawa nguji minta sukung ari bala Ketuai Pampang di Sarawak ngemaruhka penau Baru Bian lalu nyilih penuduk iya (Baru Bian) enggau chairman ke baru.