KUCHING: Kurang ari dua peratus tauka 51,372 iku peranak menua ti patut nerima vaksin Covid-19 udah nerima dos pengalak kedua.
Sapit Premier Sarawak, Datuk Seri Dr Sim Kui Hian madah, Sarawak meri dos pengalak keterubah ngagai 1,584,620 iku iya nya 72.96 peratus ari 2,171,942 iku ti beumur 12 taun enggau tuai ari nya udah nerima dua dos vaksin.
“Taja pia, naka 26 November tu tadi, semina 51,372 rayat Sarawak udah nerima dos pengalak kedua. Penyampau tu kurang dua peratus ari raban ti patut nerima dos kedua tu.
“Nya alai, mensia mayuh diperansang nerima dos pengalak, terus nyaga pemeresi tubuh diri sereta ngena sengkabung mua lebuh ba endur ti sekut laban igi penyakit tu agi ngerekai dalam komuniti,” ku iya.
Dr Sim ke mega Menteri Pengerai Mensia Mayuh, Pengawa Berumah enggau Kaunsil Kandang Menua mansutka jaku nya lebuh nyimpul jurai opis menteri iya ba Aum Ketiga Penggal Keterubah Dun Sarawak Ke-19, ditu kemari.
Ku iya, 2,430,627 iku tauka urung 86 peratus rayat Sarawak udah nerima vaksin dua dos.
