62 projek RTP ungkup Bukit Saban

BETONG: Sepenyampau 62 projek di baruh Program Transfomasyen Menua Pesisir (RTP) dikemendar ungkup Dun Bukit Saban taun tu.

Sapit Kepala Menteri Datuk Amar Douglas Uggah Embas madahka tu inisiatif Perintah Sarawak ngambika seruran meri perati enggau ngemansangka sitak menua pesisir.

“Projek tu nyengkaum 43 projek RTP di baruh agih belanja Adun seraya 19 agi projek ari agih belanja ti sama Kaban Parlimen Betong,” ku iya pengudah nguluka aum pejalai projek RTP begulai enggau ejensi bukai, ditu kemari.

Ku Uggah, semua projek nya deka dipejalai ba dua renggat enggau renggat keterubah bisi 19 projek ti udah ditinda.
Pia mega, Uggah madahka 17 projek RTP 2018 ba sitak iya udah tembu 88.2 peratus.

Sama mega enggau 27 projek RTP ti sama ari Kaban Parlimen Betong ungkup Dun Bukit Saban udah nyapai 88.9 peratus udah tembu.

Kelimpah ari nya, lebuh ngabas Rh. Linggie Keling di Sungai Langit Layar, iya mega madahka RM100,000 bajet taun tu sereta penyampau ti sama ungkup taun baru dikena ngaga timbuk nagang tanah tusur ba rumah panjai 37 pintu nya.

PEJALAI GAWA…Uggah (tengah) begambar kenang enggau pengari Opis Parit enggau Entali Ai (JPS) lebuh ngabas Rh. Linggie Keling di Sungai Langit Layar, kemari.

Suara Sarawak