6,956 ruang biilik di Tamin nerima bantu Piket Pemakai Sarawakku Sayang

TAMIN: Bantu Piket Pemakai Sarawakku Sayang udah tembu disadung ngagai 6,956 ruang bilik ba 390 buah rumah panjai di sitak Kunsil Nengeri (Dun) Tamin, sehari tu.
Nitihka penerang Adun Tamin Christopher Gira Sambang nengah laman facebook iya, pengawa nyadung bantu nya dikemujurka dalam kandang lapan hari.
“Bantu tu disadung ngagai 2,208 ruang bilik ari 104 buah rumah panjai di Selangau lalu ditangkan 1,559 ruang bilik ba 101 buah rumah panjai di Lemai,” pia ku iya madah, tadi.
Nangkan ke nya ku iya, bantu disadung ngagai 1,073 ruang bilik ba 61 buah rumah panjai di Sekuau, Oya enggau Pakoh.
Di Siong, bantu nya diberi ngagai 950 ruang bilik ari 59 buah rumah panjai ba Pasai Bon, Batu 11, Pasai Siong, Sebintek enggau Jalai Oya lalu di Tamin sepenyampau 1,166 bantu nya disua ngagai 65 buah rumah panjai ba Batang Oya, Igu enggau Batu 36 Tamin.
“Kitai meri terima kasih ngagai sida ti udah nyaup nyadung bantu tu lebih agi baka Pemesai Pelilih Selangau, bala tuai raban bansa, kaunsilor, Opis Servis DUN Tamin sereta bala bukai,” ku iya.
Berebak enggau nya, Gira nangkan mensia mayuh ngambika bela bejimat sereta nyaga pengelikun enggau pengerai diri maya betapi pengelekai COVID-19 maya diatu.
“Kitai mesti nitihka atur sereta jaku tangkan ari perintah tauka opis ke bekaul ngambika bela besaup ngemunaska pengelekai COVID-19,” pia ku iya.

BANTU ARI PERINTAH… Pengawa nyadung piket Makanan Sarawakku Sayang udah tembu diatur ungkup DUN Tamin.

Suara Sarawak