70 peratus peranak menua mesti bulih imuniti beraban

SARATOK: Abis nadai 70 peratus ari penyampau tubuh peranak menua tu mesti betuchuk vaksin enti deka nyapai tagit Imuniti Beraban tauka komuniti ke udah divaksin.

Sapit Menteri Pengeluar Kuasa enggau Pengeraja Asal ke mega Kaban Parlimen Saratok, Datuk Ali Biju nyemetak madah, kerejasama ari semua raban beguna amat diatu enti deka nyapai tagit nya.

Ku iya, vaksin nyadika ‘terabai tubuh’ ti ukai semina dikena nyaga pengelikun enggau pengerai diri empu aja tang mega semua orang ti semak enggau kitai.

“Nya alai aku suah amat ngansak mensia mayuh rejister nama betuchuk vaksin enti ngasaika diri patut divaksin lalu nadai salah nulung bala bukai ke enda nemu chara rejister.

“Vaksin tu ‘engkerabun’ ti ulih dikeandalka kitai nyaga diri empu ari kena rampit penyakit Covid-19 naka diatu. Tu mih ‘sakang’ dikearap ulih nyumanka menua,” ku iya.

Ali mansutka jaku nya pengudah mendingka penerang khas pasal status kes Covid-19 ba Saratok ti diatur ba Opis Pelilih Saratok, ensanus.

Berita penuh Ruai 3 pagila.

Suara Sarawak