KUCHING: Peranak menua ulu Baram deka ngasai infrastruktur jalai ti menyana agi berindik ari pemutus Perintah Sarawak ngazet lebih 7,000 kilometer (km) jalai batang ba selampur nengeri.
Sapit Menteri ba Opis Premier Sarawak (Pengereja Kasar, Imigresyen enggau Patau Projek), Datuk Gerawat Gala madah, ari penyampau nya, bisi 2,700 jalai batang di bagi menua Baram ti nyadi jalai besai peranak ba menua ulu.
Ku iya, inisiatif nya nentuka jalai nya diseruri berenggat ngena agih belanja MARRIS ari Perintah Besai.
“Kami chukup beterima kasih lebuh Premier Sarawak madah ke Perintah Sarawak udah ngaga pemutus ngazet semua jalai batang di Sarawak nyengkaum lebih 7,000 km.
“Ari penyampau nya, 2,700 km ba bagi menua Baram. Pengudah jalai tu digazet nyadi jalai nengeri, kitai ulih nerima agih belanja MARRIS ungkup tuju nyeruri jalai tu berenggat,” ku iya.
Gerawat nyebut jaku nya lebuh ngulu ke penemuai basa 27 Tuai Komuniti enggau Tuai Raban Bansa (KMKK) ari sekeda pelilih mit di Baram begulai enggau Gerempung Kelabit Sarawak ngagai Premier Sarawak, Datuk Patinggi Tan Sri Abang Johari Tun Openg di Kompleks Kunsil Nengeri (DUN) Sarawak, ditu ensanus.
Nambah ke nya, Gerawat madah ke komuniti nya mega meri terima kasih ngagai Premier Sarawak enggau Perintah Gempung Parti Sarawak (GPS) ugkup bemacham pemansang ti udah dipejalai di Bario nyengkaum bekal kuasa karan 24 jam, arus penyambung enggau internet sereta bekal ai beresi.
Iya mega madah, entara peminta besai ti dibantai ngagai Premier Sarawak iya nya nyeruri jalai batang ari Pasar Lapok nyentuk Bario ti nyambung lebih 100 rumah panjai ba menua ulu.
Komuniti Kelabit mega minta industri Berau Bario ditegapka baru nengah chara moden dikena nambah asil berau nya lalu diatu agi dikemansang ngena chara lama.
Iya ti mega Kaban Kunsil Nengeri (ADUN) Mulu madah, Abang Johari mega bekunsi sekeda chara moden ti benung dipejalai ba industri bumai ba endur bukai di Sarawak ti mujur mansutka mayuh asil.
Kelimpah ari nya, komuniti Kelabit mega mantaika peminta numbuh pangku pengawa Temenggong ungkup komuniti Kelabit baka komuniti minoriti Orang Ulu bukai nyengkaum Lun Bawang, Bisaya enggau Penan. – EDISI UKAS
