KUCHING: Sepenyampau 83,852 iku nembiak ba Sarawak dipilih masuk Program Susu Sekula (PSS), Opis Menteri Pelajar Malaysia (KPM) ungkup taun 2023 nyentuk 2024.
Premier Sarawak, Datuk Patinggi Tan Sri Abang Johari Tun Openg madah, kriteria milih nembiak nya datai ari nembiak sekula primari enggau penatai pemisi ninting bulan ruang bilik penyampau RM1,169 enggau kuarang RM310 per kapita.
“Aku andal enggau pechaya, peneleba pengelama 40 taun raban Sabah International Dairies Sdn Bhd (SID) ulih dikena ngemujurka kerejasama enggau KPM.
“Kelebih agi, Opis Pelajar Nengeri Sarawak enggau Opis Pelajar Nengeri Sabah bejalaika PSS ngagai nembiak sekula primari ke patut,” terang.
Abang Johari bejaku munyi nya nengah teks jaku dibacha Menteri Pelajar, Inovasyen enggau Pemansang Penau Sarawak, Datuk Sri Roland Sagah Wee Inn lebuh Pengawa Ngelancharka Hari Susu Sekula Sedunya Renggat Zon Borneo 2023 di sebuah hotel ditu tadi.
Ku iya, sukung semua raban kelebih agi apai indai enggau orang sebilik ke bukai nyengkaum pengajar, raban SID, KPM enggau Opis Pelajar Nengeri endang beguna endar.
“Kerejasama semua raban tu deka ngemujurka pengawa nyendiaka bantu susu pechuma ngagai bala nembiak ti nyamin pengerai sida,” ku iya nyemetak
