KUCHING: Premier Sarawak, Datuk Patinggi Tan Sri Abang Johari Tun Openg andalka aspirasyen Sarawak dalam bidang teknologi ulih nengkebang model Artificial Intelligence (AI) kediri empu dikumbai DeepSAR (DeepSarawak).
Ku iya, nya berindik ari menua tu tau nunda model AI ti ditengkebang menua China ti dikumbai DeepSeek.
“DeepSeek tu siti AI ti ngembuan peluang besai ngaul Sarawak dalam ‘randau digital’ enggau menua bukai.
“Taja pia, ngambika projek baka nya ulih dipun, rentayan arus penyambung ti komprehensif di serata Sarawak meseti diadu dulu,” ku iya nyemetak.
Abang Johari bejaku munyi nya rambau Pengerami Makai Lemai Taun Baru China Kaunsil Multimedia Sarawak (SMA) ba sebuah hotel malam tadi.
Iya madah baru, taja pen teknologi nya ukai digaga ba jeman iya, tang iya andalka pekara nya tau nyadi nyata jemah ila.
“Tu mega engka semina mimpi aku aja diatu, tang nyangka juluk tu deka nyadi jemah ila, ukai maya jeman aku, tang engka ba taun 2030, 2035, tauka 2040,” ku iya andal.
