KUCHING: Premier Sarawak, Datuk Patinggi Tan Sri Abang Johari Tun Openg udah nepan bilun AirBaltic A220-300 ti ngena minyak bilun (SAF) ari lukut ngambi ngulu Eksibisyen Langit enggau Maritim Antarabansa Langkawi 2023 (LIMA ’23).
Ku iya, bilun nya ti keterubah ngena SAF.
“Sehari tu (22 Mei), aku diberi peluang nepan bilun keterubah ngena minyak SAF,” ku iya.
Abang Johari mansutka jaku nya ba aum pemberita sebedau ngemata bilun AirBaltic A220-300 ngisi minyak SAF ba Padang Bilun Antarabansa Kuching (KIA), ditu kemari.
Penerebai bilun AirBaltic A220-300 ti ditepan Abang Johari nya mega berangkat ngagai Padang Bilun Antarabansa Langkawi urung pukul 1.45 lemai ari KIA.
Berebak enggau nya, iya madahka pemansang lukut di Sarawak nya asil kerejasama entara Petroliam Nasional Berhad (PETRONAS) kelebih agi ba pansik enggau pemansang (R&D) enggau Kaunsil Pemansang Ekonomi Sarawak (SEDC) Energy dalam pemansut SAF.
Nambah ke nya, iya madahka Sarawak ngembuan timpuh ti chukup engkeman ungkup pemansut minyak mata (crude oil) nya.
“Kebuah pia laban ku saintis PETRONAS kitai, bisi atur diguna ba pemansut minyak mata lukut tu nyengkaum mata panas meseti chukup kelimpah karbon dioksida enggau gaya klimet ti engkeman,” ku iya.
Abang Johari ke mega Menteri Wang enggau Ekonomi Baru madah, pengawa nanam lukut pemesai 1,000 hektar ngena teknologi tu ulih ngasilka urung 500,000 tan metrik minyak mata lukut.
“Reti iya, sehari urung 10,000 tong ulih diasil ungkus ungkup setong diatu manggai USD50, enti sema kitai nyual ngagai kilang pemantis, rega iya urung USD110 setong.
“Aku ulih berati pengudah kitai nyapai pemansut besai ngena teknologi tu, ungkus engka bekurang dudi hari. Rega, udah tentu agi bepanggai ba rega minyak diatu,” terang Abang Johari.
Terang iya, komuniti mega majak ngalih ngagai kuasa ulih dikemaru laban irau ke ubah klimet. Nya kebuah, Sarawak majak nyingkang ba teknologi tu.
Kelimpah ari nya, iya ngarika Perintah Sarawak meri terima kasih ngagai PETRONAS enggau SEDC Energy laban nyadi bakih kunsi ngiga teknologi baru.
Sama datai Menteri Pengangkut, Datuk Seri Lee Kim Shin, Sekretari Perintah Sarawak, Datuk Amar Mohamad Abu Bakar Marzuki sereta temuai dipebasa bukai.






