TANJUNG MANIS: Premier Sarawak, Datuk Patinggi Abang Johari Tun Openg deka ngabas pemansang pemadu baru projek nanam tukun gaga ba tebing tasik Belawai kenyau ari lima taun ti udah.
Pengawa ngabas nya deka diatur begulai enggau Ejensi Kampung Sarawak (SFC), Syarikat Pembinaan Tukun Bebola (Sarawak) Sdn Bhd sereta Dasanrama Sdn Bhd.
Pia mega, Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madah, pengulih Tanjung Manis nyadi serega ikan majak dikelala nengah inisiatif proaktif Perintah Sarawak ti nanam tukun gaga ba sitak nya.
Lebih 600 tukun gaga bansa reef ball diengkah ba tebing tasik Belawai sepemanjai 30 kilometer nyentuk ngagai Paloh ti nyadi chara dikena nyaga bemacham pemansut maritim.
Nya mega dikena nentu pemansang industri pengawa berikan Tanjung Manis enggau sitak ngelingi nya semampai meruan.
Kelimpah nyadi palan nupi ikan, ku iya, tukun gaga nya mega dikena nagang pengawa orang berikan ari menua luar ti tama belalai ngagai endur nya.
“Tukun tu mega mantu nambahka pemayuh utai idup dalam tasik sereta ngemendarka sekeda chara nangkap ikan ba endur tu.
“Aku andal inisiatif manah Perintah Sarawak tu ulih mantu orang berikan ba Belawai nyungkak penatai pemisi tambah kelimpah matak mayuh orang ti minat nginti datai ngagai endur tu bejalaika pengawa rekreasyen kelebih agi lebuh ujung minggu,” ku iya.
Kelimpah ngabas projek tukun, Abang Johari mega disadang bejadi Pengawa Nutup Safari Nginti Tanjung Manis 2023.
