ACSJ Ke-6 nambah kategori baru

“Entara juluk ACSJ, kitai deka ngangkatka industri muzik Iban ngambika bala pengarang lagu tetap ngetanka penulin Jaku Iban ti majak pupur.

KUCHING: Sebengkah kategori baru iya nya Leka Lagu Pemadu Manah bisi dipekitka ba Anugerah Charta Sapa Juara ke-6 (ACSJ ke-6).

Tu entara enam ari kategori ti dipasuk dalam pekit dikena ngangkatka penulin Jaku Iban, jaku dalam Iban, tusun lagu enggau cherita dalam lagu muzik Iban.

Direktor Pengeluar Program Sarawak Zainal Abidin Asri Abdul Wahib madahka ACSJ serak tu deka digulu 200 iku raban pengemeran seni muzik industri Iban di Sarawak.

“Entara juluk ACSJ, kitai deka ngangkatka industri muzik Iban ngambika bala pengarang lagu tetap ngetanka penulin Jaku Iban ti majak pupur.

“Nya kebuah, kategori Leka Lagu Pemadu Manah entara kategori ti dikemeratka ba pekit tu ila dikena nentuka kualiti enggau genre lagu seraya ngena jaku ti betul ba lagu sida,” ku iya rambau aum pemberita ACSJ ke-6 di Auditrium Mit RTM ditu, pagi tadi.

Tandu iya, perambu ngeluarka ACSJ ba slot televisyen endang agi diperambu laban sida deka meda sambut ari mensia mayuh.

“ACSJ tu ila deka ditabur terus nengah radio WAIfm Iban sereta nengah ‘Facebook’ rasmi WAIfm Iban.

“Enti sambut manah ari mensia mayuh kami ari RTM endang bisi merambu deka ngeluarka pengawa tu ba televisyen laban program ti baka tu begunaka belanja ti besai,” ku iya.
Kelimpah ari nya, dia sida nyadang lebih 3,000 iku mensia mayuh deka datai ngemataka malam anugerah nya ila.

“Eastwood Valley Country Club & Gold, Miri dipilih nyadi palan malam anugerah lalu kami nyadang lebih 3,000 iku mensia mayuh deka datai.

“Malam anugerah deka berengkah pukul 8 malam, tang sebedau nya kenyau ari pukul 3 lemai sigi mayuh aktiviti enggau program deka diatur RTM Miri nyerumba pengawa nya,” ku iya.

ACSJ ke-6 taun tu deka ngayanka lapan iku penanyi solo enggau tiga penanayi beraban ngerebut lima agi kategori bukai iya nya champion, lumur dua, lumur tiga, Sada Nyawa Pemadu Manah enggau Finalis enggau Lagu Dikerindu.

Champion deka nerima perais RM10,000, lumur dua (RM8,000), lumur tiga (RM5,000), Sada Nyawa Pemadu Manah (RM2,000) seraya Leka Lagu Pemadu Manah enggau Finalis enggau Lagu Pilihan deka nerima trofi.

Sama bisi datai Menijar WAIfm Datin Lydia Paya, Ketuai Pemantu Direktor Seksyen Radio Zulkefli Mohd enggau Pemantu Direktor Berita Ngelansa Marril Chunggat.