Adat Bunga Selamat

Dayak rebak baru patut ngelala adat tu ungkup pengawa jadi melaki bini

ROBAN: Raban bansa Dayak lebih agi rebak baru endang diperansang ngemeranka adat asal ti ditampung ari aki ini taja udah megai pengarap baru nyadika tenggau enggau lalau pengidup.

Baka nya mega lebuh kitai nerima penatai orang baru ba ruang bilik ti endang meruan adat enggau sempekat ditanggam ngambika kaul begulai enggau pangan diri enda mudah retai sereta semampai dipebasa.

Sempama takar pasu, chupak enggau gantang ti bisi bida, baka nya mega adat dipegai bagi menua Betong ba pengawa tikah tauka ngatur adat jadi melaki bini.

Penghulu Wilfred Empati dipebasa bejakuka Adat Bunga Selamat entara Macdenver Dundang Anak Engkamat enggau Jessica Jerami Anak Ajok di Rumah Siti Jubidah Lanchang, Sungai Engkabang Tengah, Roban kena lemai 3 Jun tu tadi.

BUNGA SELAMAT… Macdenver enggau Jessica dirami bala mayuh.

Bunga Selamat tu bisi bida enggau pengawa melah pinang ti suah dirami kitai ngelama tu enti disebut ngerami sida ti jadi melaki bini.

“Pengawa lemai tu diatur kitai ngena Adat Bunga Selamat, ditibak ari Seksyen 148 – Adat Iban 1993, laban seduai tu udah lama begulai enggau pangan diri lalu udah beterang ba mua mayuh sereta udah bisi pemai – anak.

“Pengawa kitai lemai tu tau dikumbai ngerami seduai ti udah mujur nirika ruang bilik lalu seduai tu diambi adat empat igi jabir sepiak-sepiak tauka pulai ngagai mata duit kitai diatu RM4 siku.

“Adat tu berundingka seduai melaki bini bela bisi pemandai enggau pelajar, bisi batang pengawa ti menyana sereta penuduk ba pangku pengawa,” ku Penghulu Wilfred Empati nerangka adat dikena ngintu Macdenver enggau Jessica.

Pengudah tembu berandauka adat Bunga Selamat, seduai diberekat ngena pengawa merekat tinchin ari Father Philip Mang dientudi bacha sempekat tikah.

MEREKAT… Father Philip merekat Macdenver enggau Jessica.

“Atur pejalai mensia majak nambah ti belalau sereta nunda ajar Tuhan, diletak awakka lelaki enggau indu ulih begulai bebaik, ngibun ruang bilik diri enggau naka pengelikun.

“Anang leju besampi, ngelempaika pengandal diri ngagai Tuhan laban ari berekat iya ruang bilik kitai deka likun,” ku ajar Father Philip.

Bela bisi nibarka jaku ajar Tuai Rumah Peter Lembang ari Sungai Bong, Teru Tinjar di Baram, pengari indu ti ngajar seduai begulai manah.

“Enti kelia lain chara kitai ngajar sida. Ambika chunto, lelaki meseti nemu beban, lalu indu enda tau enda nemu betenun enggau ngintu pengawa di rumah.

“Baka tu kitai ngerami seduai, baka tu mega kitai ngajar seduai ngambika ulih segulai sejalai,” ku ajar iya.

ADAT… Tuai Rumah Siti Jubidah nyuaka adat empat igi jabir tauka RM4 ngarika anak iya, Macdenver.

Nangkan nya, Penghulu Wilfred Empati mega bisi ngelansa sekeda adat kelebih agi ngaul adat nguai tauka ngugi laban nitihka aum sereta randau ti udah dipesetuju kededua piak, seduai bela enda nguai, kin kitu nitihka periuk asi.

“Kitai jadi ukai ketegal pengerindu lebuh agi biak aja, anang baka ngena gari sereta anang bisi niat ngayahka pangan diri.

“Seduai mega ditangkan anang enda bebasa bala temuai ari sepiak-sepiak, baka bebasaka diri sebilik.

“Kingat mega pemanis keterubah kitai nanggam pengerindu lalu Petara aja ulih nyerara seduai. Kami ditu bela besampi ngajihka seduai beranak betelesak, mentas, diau bebaik sereta bebatak asur ngintu ruang bilik,” ku Penghulu Empati ngelalau.

Dulu ari nya, bala pengabang ari rumah panjai besemak kelebih agi sida ke bisi dikangau datai ngulu pengerami baka ari Nanga Ulai Debak, ditiki ngena adat basa enggau tabuh.

Pengudah tembu pengawa merekat enggau besarung tinchin, dientudi nyirap kek enggau berisan tauka beambu isan ngena macham main enggau pekit ti ngerapitka tanggam kaul kededua piak disempulang pengawa beperindang bukai.

KENANG MANIS… Gambar nyadika pengingat Tuai Rumah Siti Jubidah sebilik.

 

RICHAH… Pengabang ditiki ngena tabuh sereta bejalai niti ruai sekali besundang.

 

BASA… Pengabang ditiki ngena adat basa diuluka ex-DSP Bakar Sebau, siku ari kaban Gerempung Gagung SDNU Pampang Saratok.