TEBEDU: Komiti Pemansang enggau Pengelikun Genturung Pendiau (JKKK) beempu tanggungpengawa dikena nyaup ngetan adat enggau main asal bansa ngambi enda lenyau.
Kaban Kunsil Nengeri (ADUN) Tebedu, Dr Simon Sinang Bada muji JKKK Kampung Krusen Kranji ke bejalaika inisiatif nentuka adat enggau main asal Bidayuh ulih ditan taja pen bisi penguji enggau penusah.
“Pengerami Gawai Dayak udah lama diatur ari jeman aki ini kitai kelai taja pen haribulan pengerami maya nya enda sebaka ba genap genturung pendiau.
“Ketegal sedar pemesai reti pengerami tu, Perintah Sarawak udah netapka 1 June nyadi kemisi besai ngambi bansa Dayak ulih begulai ngintu Gawai,” terang iya.
Simon mansutka jaku nya ba Program Rami Nyisan Bunos Gawai 2023 sereta Pengawa Bejadi ‘Awning’ Awah Gawai Ntangan Biriyak di Kampung Krusen Kranji ditu, apin lama ti udah.
Simon mega nyebut pasal pemesai reti pengawa nyukat Tanah Hak Adat Bansa Asal (NCR) dikena nyamin pengelikun hak ngempu tanah.
Ku iya agi, tanah ti udah disukat mega meri jamin ngagai sida ke deka minta jali ari bank dikena melanja pelajar bala anak enggau mega bejalaika pengawa dagang.
Ba pengawa sebaka, Simon mega ngemendarka agih belanja Projek Mit Pemansang Menua Pesisir (MRP) penyampau RM20,000 ngagai komiti Projek Dokumentesyen Tanah (LDP) lalu JKKK Kampung Krusen Kranji nerima RM10,000 enggau RM5,000 diberi ngagai Gerempung Indu genturung pendiau nya.
Sama datai Chairman Pengatur Pengawa ke mega Tuai Bansa Kampung Krusen Kranji, Donald Paru enggau pengari Residen Bagi Menua Serian, Wee Chung Yee.






