Adat Melah Pinang: Reti enggau tuju

KUCHING: Kitai sama nemu pengawa nikah ba reti jaku kitai bansa Iban iya nya Melah Pinang.

Ku Johh Adam Gilbert, nyau dua udah uchu iya tang baru diatu meda pengawa bejadi melaki bini ke bendar dikumbai kitai Melah Pinang ngelama tu.

Suah agi enti ba rumah panjai, orang semina bejadi ngena chara tikah kemaya hari nitihka singkang pemansang enggau pengarap ti dipegai sida, tang nadai meda orang melah buah pinang.

Ku iya, agi kelia ba menua sida di Paku Betong lebuh Melah Pinang, dia orang ke tuai bejaku semina nyebut seduai nya tau jadi melaki bini laban ukai salah serak tang pinang enda dibelah.

“Lalu bisi mega aku meda lebuh nikah kami serumah ba Rumah Martin, Tuah di Kanowit, udah sida ke indu belaban Bebuka Baku dia sida lalu melah buah pinang ke dalam baku nya lalu dilambung ba mua mayuh.

ANGKUNKA ADAT LAMA… John Adam Gilbert

“Baru sekali ngelambung dia apai lelaki lalu ngerara ngasoh badu agi ngelambung buah pinang ti udah dibelah nya.

“Aku berasai enda puas ati laban enda nemu kebuah lalu nama reti buah pinang nya dilambung baka nya.

“Dia bini aku bisi nyebut kebuah tang bedau nyentuk laban iya pan enda nemu nama reti buah pinang ke dilambung nya nitih ke adat kitai Iban,” ku John nikalka kenang diri.

Nyadi ujung bulan nyin tadi, John bisi dibai bakih ngulu pengerami Melah Pinang di menua Nanga Kantu Asam, Kapuas Hulu, Kalimantan Barat.

Bejadi ke lelaki nya kitai bansa Iban ari menua Nanga Badau lalu indu nya indai iya bansa Kantu tang apai iya bansa Jawa megai pengarap Islam sereta sida diau ba rumah nyembuah baka genturung pendiau laut.

NGASU PENEMU… John (empat kanan) enggau bala bakih bukai begambar ba laman rumah Pengerami Melah Pinang dipejadi di menua Nanga Kantu Asam, Kapuas Hulu, Kalimantan Barat, ujung bulan nyin tadi.

Taja pia ku John madah ngagai Suara Sarawak, lebuh raban lelaki datai, sida dilalu ngena gendang ajat lalu bisi mega orang ngajat nyambut penatai sida nya, udah nya baru bala raban Islam nyambut ngena kompang.

Semua temuai ke datai diberi makai magang ngena chara buffet, tang sebedau makai diasuh nulis nama dulu ba siti bup ti disedia ba pintu penama.

“Bansa pemakai dinah endang baka enggi kitai menua tu semina nadai dagin jani disumai ke lauk.

“Seduai ti deka jadi nya enggau apai indai seduai sigi udah duduk berintai ba atas panggau ti ditaga ke sida.

“Sambil makai, kami lalu diperindang raban pemerindang ngena mayuh macham lagu Iban enggau lagu bansa bukai tang lagu Iban kitai menua tu enggau lagu Iban sida menua nyin nadai putus putus besilih ganti.

TEPERINDANG… Pemerindang ngena live band ti nyadaka mayuh macham lagu Iban enggau lagu bansa bukai.

“Aku muji sida amat landik belagu laban ngena live band sereta ulih ngingat semua leka lagu ti dibai. Mimit nadai aku ngadang sida menua nya landik amat belagu,” ku John, peranak asal Rumah Henry Jawan, Serudit A. Betong.

Pengudah tembu makai sida sebuat lalu mandi ke sungai Nanga Kantu ti mati ba ai Batang Empanang, Kapuas Hulu.

Tembu mandi sida lalu mansang baru kia laban deka meda baka ni adat sida dia Melah Pinang.

“Udah kami semua terenah duduk magang dia sida ke tuai ari laki enggau indu lalu berandauka adat kena seduai jadi melaki bini.

“Ba adat tu peda aku lebih kurang sebaka enggau adat kami menua Saribas enggau Kalaka. Semina sida bisi nyebut adat ai ganti susu indai ti pulai ngagai bala indu.

NALI ADAT… Seduai ti jadi melaki bini dibiau ngena manuk sebedau darah ari dungul manuk ti disayat ditata ba kening seduai.

“Kelimpah ari nya, sida bisi nyebut derian, pengangkat, penuduk, lalu semua ngena mata duit rupiah magang tang nadai bederian ke setawak, gong tauka utai lama ti bukai baka bansa Memaloh.

“Nyadi ba hal pengarap endang nadai disebut laban ba adat sida din indu sigi nguai ke lelaki lalu nitihka atur ba ruang bilik lelaki ti enggau iya jadi,” terang iya ti nguai jadi enggau orang Rumah Tugau, Brayang Kemuntang, Roban lalu nampung orang dia.

Nyau datai ba pengawa Melah Pinang dia John lalu betanya ngagai ketuai adat sida din iya nya Patih Badau ke benama Untam ari Sebindang enggau Patih Landjak ke benama Unggang.

“Nitih ku tusui seduai, sida din endang amat melah pinang lebuh bejadika orang melaki bini.

“Tang buah pinang ke udah dibelah dua nya enda dilambung agi baka kelia enggai ke ngeruga pendiau seduai ti jadi melaki bini.

“Buah pinang ke udah dibelah nya tadi disatup ke baru lalu ditanchang ngena benang mirah ngambi ke teguh enda tebererak sereta disampi ke seduai nya begulai sejalai sampai parai.

“Udah nya tadi buah pinang ke udah disampi nya lalu diengkah ba piring pedara sepengelama tiga malam, baru nya tau dibuai.

Nyadi orang ke tau diasuh enggau melah pinang nya tadi enda tau enda siku lelaki enggau siku indu ari kededua piak seduai ti jadi.

Lelaki ke tau diasuh melah pinang nya meseti lelaki ke chukup umur, udah mujur ngidup kediri ti tau nyadi ke teladan mensia mayuh.

Lalu indu ke tau diasuh melah pinang nya mega meseti indu ke tuai umur sereta beperidi mayuh anak, sereta lantang ngidup kediri nyadi tuai indu bukai.

“Nyadi enti buah pinang ke udah dibelah dua nya dilambung lalu labuh ba tikai ngemai tiga reti.

“Kesatu, enti buah pinang nya sepiak telentang, sepiak tungkup nya nanda seduai nya enda panjai begulai tauka siku ari seduai enda gayu nguan menua. Tang bisi mega orang kala nyebut ngumbai nya ulu pendiau seduai ila ti manah.

“Reti kedua, enti buah pinang nya kededua piak sama tungkup nandaka pendiau seduai endang nadai diau lantang nguan menua sereta sama enda gayu.

“Kepenudi, enti kededua buah pinang nya bela telentang nya baru nandaka pendiau seduai ila gerai nyamai lantang senang gayu nguan menua,” ku John ngerintai reti pendiau pinang ti dibelah.

Udah tembu pengawa Melah Pinang ku iya, sida ke tuai lalu dipilih nibarka jaku ajar ngagai seduai ti baru jadi nya ngarika bala lelaki enggau indu.

Tembu jaku ajar ditibar, sida lalu besurung ke adat nitihka aum sempekat sida ti bejadi seduai melaki bini nya tadi.

Udah nya Patih Untam ari Badau lalu diasuh miau seduai ke jadi nya ngena manuk.

Pengudah dibiau, dungul manuk lalu disayat ngulihka darah manuk nya kena nata kening seduai ti jadi enggau nata buah pinang ke udah dibelah lalu bulu manuk ke bisi darah nya diengkah begulai enggau piring ke endur engkah buah pinang tadi.

Tembu nya tadi bala lalu berami sampai pagi, ngirup tuak, ai ijok enggau chap langkau sereta ngirup kupi ti bisi disedia sereta bepakaika lauk, kasam ikan, keropok, upa, ruti enggau pemakai bukai ti dinah.

“Adat basa sida ngelalu penatai temuai chukup manah, nadai endur kitai mantah.

Semua sida berandau ngena Jaku Iban lalu aku nyau asai ke diau ba menua kitai di Sarawak tu empu,” ku John nyimpul randau.

Suara Sarawak