Adat Nasih Sungai dibasa

KANOWIT: Sekeda menua agi bebasa enggau ngemeranka Adat Lama taja menua udah jauh berubah dibai segang pemansang.

Raban bansa Dayak Iban adap ke Batang Rajang, Kanowit ditu agi bepegai tegut ba adat Nasih Sungai.

Adat ke ditampung ari aki ini tu endang balat dikemeran sida ke agi diau ba tebing sungai dikena minta berekat ari petara.

Nitih ku penerang, pengawa tu dikereja sebedau sida ngatur pengerami baka lumba perau tauka pengawa bukai ti bekaul.

Empai lama tu tadi, Kaban Kunsil Nengeri (Adun) Ngemah Alexander Vincent udah dipebasa ngaduka adat nya beserimbai enggau pekit lumba perau.

Alexander madahka diri chukup temegah ati meda rayat dipegai iya agi siru ngintu enggau nyaga adat lama ti nyadika malin ba pengidup sida.

Tu mega basa kitai ngagai petara ti ngatur semua pekara nyadi ba dunya kelimpah minta diri likun, menua chelap lebuh ngatur pengerami ba sungai.

Pekit nya sebagi ari tusun program ba Pesta Kanowit 2019 ti diatur ninting taun.

MINTA PROGRAM MUJUR… Alexander nyimpan piring dalam teresang.