Adat Nguai enda tau dilengka

SARAWAK nyelai laban diuwan pupu bansa ti ngemeran macham adat lama, daya idup, bansa jaku, jalai pengarap, seni enggau main asal.

Dayak Iban ti nyadi bansa majoriti diau di menua tu ditemu orang siru idup belalauka adat ti ditampung ari sida ke tuai menya.

Ku Tuai Rumah Akul Dagang ari Sungai Belalang, Salim di Sibu, bansa Iban endang chukup bebasaka adat ti nyadika lalau ba pengidup besehari sehari.

“Adat tu mungkur semua pengawa kitai nentuka pengidup kitai meruan sereta menyana agi lalu nadai ngemedis diri empu, orang ti enggau sebilik sereta bala bukai.

“Nya kebuah kitai numbuhka Native Courts tauka Kort Bumiputera ti bejalaika Adat Asal Iban tauka Tusun Tunggu Iban enggau Undang-Undang Majlis Adat Istiadat,” ku iya ngelansa.

NGETAN ADAT LAMA… Tuai Rumah Akul Dagang

Tuju guna Adat Iban dikena nanggam pendiau enggau ulah begulai enggau diri sama diri awakka ngemai penyelap, pengerai enggau pengelantang.

Ulah enggau pendiau ti manah belalauka adat ukai semina nanggam diri sebansa enda belah tang mupuk matih pendiau ti menyana ba mua Petara ngambika tau diau chelap lindap nguan menua, ku iya.

Bekenangka sebagi ari adat jadi melaki bini iya nya Adat Nguai lalu bisi sekeda menua nyebut Adat Ngugi.

“Enti suba, adat tu dipejalai enggau ati lantang laban ngaul basa ngagai pangan diri, belalauka sempekat jaku ti udah ditanggam kededua piak.

“Tang jeman kemaya hari Adat Nguai tu suah dipetalat lalu tebal agi sida ngena penemu baru, ‘tengahari’, ti dipeda enggau dirunding rebak baru penemu ti manah amat.

SABUNG JADI… Seduai ti jadi melaki bini deka dirami lalu Adat Nguai deka disebut.

“Reti penemu tengahari tu iya nya enda nguai ke sapa-sapa, sepiak tulung, sepiak gusung.

“Kebuah pia laban ba penemu sida kitai anak endang enda tau melakangka orang tuai, nadai chara kitai ulih malas jasa sereta budi apai indai ti udah ngadaka kitai ke dunya, ngemesaika kitai nyadi orang ti menyana,” ku Tuai Rumah Akul bechuntoka penemu rebak baru diatu.

Taja pia ku iya, Adat nguai tu enda tau enda dikemeran lalu anang sesekalika ngelengka adat lama tu dikena nandaka diri baka perau udah bisi penyangkai, baka ruai udah bisi balai.

Adat tu mega ngayuka kitai baka kayu meruan tuga, baka lalau meruan tangga laban nasip kitai mensia siku-siku enda sebaka, tuah kitai anak uda enda serupa, enda semua utai dikedeka kitai nyadi nyata.

“Enda bula penemu rebak baru ti madahka diatu kitai enda ibuh bgunaka Adat Nguai, ketegal bekereja sebelah mengeri lalu meli rumah kediri lalu ngentapka pendiau sida dia.

BAMBU ISAN… Muka baku entara uti dikena kededua piak ngempitka kaul pengudah Adat Nguai disempekat.

“Ba aku, tu penemu sekeda sida ti udah meruan sarang, udah tebelika rumah lalu ulih ngidupka diri.

“Tang munyi ku jaku aku dulu tadi, laban nasip kitai mensia enda sebaka, ukai baka tuah manuk dipeda ba kaki, enda semua utai gerah mudah diulih sepeneka nyebut.

“Baka ni sida ti enda tebelika rumah, semina kereja bekuli diau ba rumah lus tauka rumah kompeni tauka semina nyua sebelah atas kedai? Kursemengat, tampal pending antu, pending jelu enti utai jai nuntung.

“Maya tu baru kitai berunding kini tunga pemulai, kulu enda, kili enda ketegal udah ari pun aum madahka diri sama enda nguan, ngena penemu tengahari.

“Laban adat rumah panjai sigi enda tau di tiki bangkai mensia menua bukai, taja bilik apai indai endang agi meruan dia.

“Enti sema orang siru enggau sinuka kitai ti bempu penusah kitai tetap dipinta ngisi tunggu enggau meri genselan.

“Mayuh udah dipeda mata, kitai bansa disenggai sebelah lus kunterik, sebelah rumah kompeni, sebelah rumah setinggan nyengkaum ba rumah mati di sepital.

“Tu penanggul besai ditapi kitai enti enda begunaka Adat Nguai laban sida ke tuai enda ngaga adat ngapa enti nadai kebuah, enti nadai tuju ti pulaika pengelantang kitai,” ku iya ngemai kitai tuai agi runding.

Ngelansa pasal pengawa bebagika reta tengkira tanah buah ngagai sida ti udah nguai bepanggai ba penyinu enggau penyiru apai indai sereta bala menyadi diri empu.

Taja udah nguai agi diungkupka reta, semina orang ti ngibun bilik tauka orang tuai deka dua ungkup, siti ungkup dikumbai orang lanting.

“Indah anak ti udah diiru orang menua bukai agi diungkup, enda mayuh biar beduaka mimit ketegal penyiru kitai bansa.

“Adat Nguai tu enda tentu tak besai tang enggaika nama-nama bisi utai nyadi jemah kelebih agi pasal reta tengkira tauka lesi bebadi.

“Nadai utai dulu disebut tauka ditanya orang, iya tu nguai ke orang tauka enda, dia Adat Nguai tu lalu disebut ba Adat Pemati,” ku iya nyimpul randau enggau Suara Sarawak.