Adib enggau Julius nambah midul emas ungkup Sarawak

KUCHING: Altlit biak nyemerai Para, Mohammad Adip Iqbal Abdullah enggau atlit senior Julius Jeranding, beumur 33 taun mujur nambah dua agi midul emas ungkup tim Sarawak.

Adip, 20 taun bulih emas ba lumba 50 meter (kategori S14) lalu Julius ba lumba 59 meter (kategori S11-S13).

Ba hari kedua kemari, dia tim nyemerai Para Sarawak mujur bulih dua emas, dua perak enggau dua engkeraju, ku Menijar Tim Sarawak Dayang Azlina Awang Alli.

“Tu berekat ari pengeransing enggau disiplin ke udah dipandangka sida sekumbang belatih ngelama tu, ku iya madah nengah aplikasyen WhatsApp.

Mohd Adib Iqbal

Nangkan nya, midul perak mujur diulih nengah Rusdianto Rusmadi enggau tim beraban lumba 4 X 100 (34 poin).
Midul engkeraju diulih mega nengah Rusdianto enggau Raphelson Richard Hamit.

Lumba Nyemerai Para Tebuka Malaysia tu benung diatur ba Palan Akuatik MPK di Kuantan, Pahang nyentuk 24 March tu.

Ngelansa penerang pemenang midul emas tu, Julius Jeranding kala nyereta Lumba SEA Malaysia 2017 enggau Lumba Asia di Jakarta, Indonesia 2018.

Ungkup lumba udah tu ila, Julius deka ngarika Malaysia ba Lumba Champion Dunya 2019 ke deka diatur bulan Julai di Singapura.

Udah nya, Adip ke mega atlit nasional kala besekula ba SMK Asajaya enggau kala nyereta Lumba SEA Malaysia 2017 enggau Lumba Asia 2018 di Jakarta, Indonesia.

Penyampau semua midul diulih tim Sarawak naka hari kedua iya nya 18 midul iya nya enam emas, enam perak enggau enam engkeraju.

KAMI ULIH…Dayang (empat kanan) begambar kenang enggau atlit nyemerai para Sarawak ba Palan Akuatik MPK di Kuantan, Pahang kemari.

 

Julius Jeranding

Suara Sarawak