TANJUNG MANIS: Perintah Besai nengah Komiti Besai Komunikasyen enggau Multimedia Malaysia (MCMC) naka ulih mantu Sarawak nyapai agenda ekonomi digital nengah Kaunsil Multimedia Sarawak (SMA).
Menteri Komunikasyen enggau Multimedia Malaysia Tan Sri Annuar Musa madahka perintah nengeri tu udah ngepunka program nengah Sarawak Linking Rural, Urban and Nation (Saluran) mungkur National Digital Network (Jendela) siti agi inisiatif MCMC.
“SMA udah baka menyadi MCMC dalam ngatur program arus penyambung di Sarawak.
“Pekara ti beguna digaga MCMC iya nya meri sukung tegap ngagai pelin enggau strategi SMA,” ku iya lebuh Program Nuju Digital SMA betemu rayat ditu, ensana.
Ku iya, pegai Kepala Menteri Datuk Patinggi Tan Sri Abang Johari Tun Openg udah nerangka agenda Sarawak ngelakuka enggau bejalaika pengawa ekonomi digital.
“Kepala Menteri bisi tuju ti nyemetak mai agenda ungkup komunikasyen nengah kualiti arus penyambung ti manah baka 4G enggau 5G ti diperambu kami.
“Ambika chunto, dalam sektor betanam betupi, Kepala Menteri udah ngaga projek pemungkal baka ni ngena mesin awakka kitai nadai kelalu bepanggai ngagai pengereja pengawa ari menua luar.
“Baka nya mega pelin ngena teknologi robot ti udah ba tikas pemadu manah diatu,” ku iya.
Annuar mega madahka iya pechaya ekonomi digital ulih dikemujur ba menua laban bisi perambu ti manah.
“Nya alai, kitai begunaka perambu ti manah, semua inisiatif mesti nitihka taga baka chunto timpuh tiga taun agi kitai deka ngulihka arus penyambung 5G.
“Nyema nitihka taga kitai merambu deka ngaga pengawa tu ba taun 2030 tang kitai berengkah dulu ketegal deka ngemujurka pengawa nya lengkas.
“Nyema kitai berengkah taun baru, kitai ulih nyapai 30 peratus lalu timpuh tiga taun ti deka datai kitai ulih nyapai 80 peratus ke bukai,” ku iya.
Iya nangkan nya madahka MCMC deka mantu SMA ngulihka serikat arus penyambung masang perengka sida pengudah tiang pemanchar tembu digaga.
