KAPIT: Pemansang ti dipejalaika Perintah Sarawak begunaka sukung tegut ari rayat, pia ku Sapit Kepala Menteri Tan Sri Datuk Amar Dr James Jemut Masing.
Ku iya, sukung rayat beguna amat nentuka langgur pemansang ti deka dipejalai dikemujur.
Ku Masing, agenda pemansang enda ulih dipejalai enti rayat nadai nyukung tauka setujuka perambu nya.
Nya kebuah, iya ngelalau rayat nerima penemu tauka langgur pemansang ari perintah ungkup pengelantang dudi hari.
Masing mansutka jaku nya rambau Pengerami Ketuai Begulai Enggau Rayat ba Rumah Gindal, Pulau Sibau, Sungai Mujong, kilah ensanus.
Iya ti mega Menteri Pemansang Infrastruktur enggau Palan Penyangkai Kapal madahka, pemansang ba Bukit Mabong ditu patut diperambu enggau manah.
“Nya kebuah, peranak mesti meri kerejasama kelebih agi bekaul hak nyukat kelingi tanah Adat Bansa Asal (NCR) ngena Seksyen 6 enggau Seksyen 18 Kanun Tanah Negeri.
“Sekeda projek besai ba Dun Baleh, sekalika udah tembu, benung digaga tauka baru berengkah deka meri empas ke manah dalam pemansang ba pelilih Bukit Mabong,” terang Adun Baleh nya.
Nambahka nya, iya madahka perintah nengah Opis Menteri Pemansang Menua Pesisir (KPLB) deka bejalaika Projek Jalai Nanga Mujong/ Nanga Tiau/Tunoh penyauh 77 kilometer beungkus RM550 juta.
Masing mega madahka Projek jalai tu deka dipasuk dalam Langgur Pemansang Malaysia Lumpar Ke-12 (RMK-12).
