KUCHING: Pengundi ba sitak Telang Usan patut terus meri sukung ngagai penyandang iya Dennis Ngau, ke udah dichalun baru ngetanak penuduk sida nya.

Sapit Kepala Menteri Datuk Amar Douglas Uggah madah, tu beduduk ari agi mayuh perambu enggau program pemansang deka digaga dibaruh Ejensi Pemansang Tanah Tinggi (HDA) dibaruh iring Gempung Parti Sarawak (GPS).

“Nengah pengawa ngetanka iya (Dennis) ba Telang Usan ke nyadi kubu kuat GPS, semua program enggau langgur ke diperamvu deka dipelajai enggau mujur ditu.

“Naka tu, Telang Usan udah nerima urung RM750 juta projek pemansang ke bisi disediaka perintah GPS,” ku iya.

Uggah madah munyi nya maya bejadika Program Ngundang Komuniti Betanam Betupi (AgriCOP) ba Long Bemang ditu, ensana.

Kenu ku iya, Dennis endang siku orang ke bagas gawa, siruka rayat sekumbang iya udah menang bisi ba sitak nya ari taun 2016.

“Iya sigi patut diberi peluang bediri neruska rikod manah iya gawa ke rayat ba sitak tu,” ku iya.

Uggah mega amdah undi ungkup Dennis sebaka reti meri sukung ngagai Kepala Menteri, Tan Sri Datuk Patinggi Abang Johari Tun Openg.

“Sekumbang udah bejalaika pengawa, Abang Jo udah mandangka diri endang tuai ungkup semua bansa ba nengeri tu,” ku iya.

Uggah mega madah nya ukai bejaku ngapa laban iya empu udah enggau ngemendarka penumbuh Ejensi Pemansang Rajang Atas (URDA), Ejensi Pemansang Tanah Tinggi (HDA) enggau Ejensi Pemansang Wilayah Utara (NRDA), sereta sekeda ke bukai mungkur semua komuniti ba nengeri tu.

“Genap ejensi mega udah diberi agih sepenyampau RM1.5 bilion dikena bejalaika program pemansang sosioekonomi enggau infrastruktur,” ku iya.