Agong aja bisi kuasa penuh

KOTA SAMARAHAN: Semina Yang di-Pertuan Agong Al-Sultan Abdullah Ri’ayatuddin Al-Mustafa Billah Shah ulih ngaga pemutus nyiri sebarang Kaban Parlimen (MP) nyadi Menteri Besai Malaysia, ku Datuk Peter Minos.

Penganalisis Politik nya madah, baka ditemu kitai semina Agong aja bisi kuasa penuh ngaga pemutus bepelasarka Konstitusyen Perintah Besai.

“Nyiri sebarang MP nyadi Menteri Besai nitihka penemu iya empu tauka ngasuh majoriti ba Dewan Rakyat. Tu kuasa penuh Agong.

“Agong engka deka nampung pemutus nyiri Dr Mahathir Mohamad nyadi Menteri Besai Malaysia ke bendar, ukai interim,” ku iya madah ngagai Suara Sarawak nengah sebengkah penerang, ditu tadi.

Ku Minos, enti ukai ketegal pekara ke nyadi, Agong enda ngaga pemutus baka nya.

“Agong baka nadai pilih bukai kelimpah nyiri Dr Mahathir nyadi Menteri Besai Interim lalu iya ulih meri sanding penemu ngagai Agong ngatur Pengawa Bepilih Ngenyit (snap election) nadai ngira sekalika rayat Malaysia setuju tauka enda.

“Tentu mega Pengawa Bepilih Ngenyit tu deka diatur enda lama agi, kandang dua taun pengudah bepilih dalam bulan Mei 2018 lalu belanja chukup besai sereta nating menua.

“Taja pia, kitai nadai pilih bukai dikena mutarka penyarut politik ke nyadi diatu tauka setuju enti kitai ka baka nya, sekalika bisi pilih bukai?” ku Minos nanya.

Suara Sarawak