AI pengelebih mantu ekonomi S’wak

“AI sebagi ari proses beguna dikena nambahka rega ngagai penatai pemisi kami enggau ngelimat penatai pemisi seriris program transformasyen kami dalam nyapai ekonomi digital.”

KUCHING: Sarawak ngempu kapasiti dikena ngubah ekonomi ari konvensional ngagai digital laban ngempu semua pengulih ti dikena baka Artificial Intelligence (AI), Bioteknologi dan Nanoteknologi.

Kepala Menteri Datuk Patinggi Abang Johari Tun Openg madah ari sukut AI, Sarawak benung bekoloborasyen enggau orang pandai ba pemansang teknologi nyengkaum Huawei dikena ngemansutka penau intelektual napi teknologi.

“AI sebagi ari proses beguna dikena nambahka rega ngagai penatai pemisi kami enggau ngelimat penatai pemisi seriris program transformasyen kami dalam nyapai ekonomi digital.

“Aku ngasai kami diatu ba palan ti patut ngemansutka raban bepenau ti bisi pengidup ti tampak enggau ulih ngubah ekonomi,” ku iya.

Datuk Patinggi Abang Johari Tun Openg

Iya bejaku munyi nya lebuh bejadi ‘Sarawak Beyond Paradigm Summit 2019’ ba sebuah hotel tebilang ditu, kemari.

Ari sukut bioteknologi, Abang Johari madah Sarawak ngempu biodiversiti ti ulih ngeluarka mayuh produk baru.

“Kami bisi mayuh sumber ubat ari biodiversiti ditu,” ku iya.

Kelimpah nya, ba sukut nanoteknologi iya madah Sarawak mayuh perengka baka arang ti ulih mansutka kuasa kayu.

Nangkan nya, ku iya perintah Sarawak udah bekerejasama enggau Shell nanam baru kayu ti udah ditebang enggau numbuhka spesis kayu baru.

“Tu meh chara dikena maju enggau kami nadai jalai bukai ari ngena teknologi jeman diatu,” ku iya.

‘Sarawak Beyond Paradigm Summit 2019’ diatur dikena mantaika penyedar mensia mayuh pasal guna teknologi enggau Revolusyen Industri 4.0 (IR4.0).

Pengawa tu diatur Serba Dinamik Holdings enggau kerejasama Kunsil Pemansang Beranakka Puku Malaysia (MIDA), Opis Ekonomi Digital Malaysia (MDEC), Microsoft Malaysia, Palan Penyulut Teknikal Sarawak, Huawei enggau TM One lalu disukung Kunsil Multimedia Sarawak (SMA).

Sama datai Menteri ba Opis Kepala Menteri Datuk Talib Zulphilip, Menteri Muda Pemansang Dagang Mit enggau Jelan Pemesai (PKS) Datuk Mohd Naroden Majais, Chairman Serba Dinamik Abdul Kadier Sahib enggau Penyanding Penemu Sains Sarawak Datuk Patinggi Tan Sri Dr George Chan.