KUCHING: Sarawak deka negap rentayan penerebai bilun sereta muka mayuh agi peluang ba sektor dagang temuai lebuh AirBorneo berengkah bejalai.
Menteri Dagang Temuai, Industri Kreatif enggau Seni Pemerindang Sarawak, Datuk Seri Abdul Karim Rahman Hamzah madah, servis AirBorneo deka ngemuntangka Sarawak nentuka destinasyen strategik.
Ku iya, nya dikena matak mayuh agi temuai, lalu nyungkak penumbuh industri dagang temuai nengeri tu.
“Perambu jalai enggau destinasyen AirBorneo berengkah ari diatu patut diseraris enggau makit ti dituju sereta produk dagang temuai menua tu.
“Kerejasama rat entara kompeni penerebai bilun enggau industri dagang temuai beguna endar,” ku iya.
Karim bejaku munyi nya rambau Nyimpul Jurai Opis Menteri Menteri Dagang Temuai, Industri Kreatif enggau Seni Pemerindang ba Aum Kunsil Nengeri (DUN) Sarawak Ke-19 ditu, kemari.
Ngenang pekara bukai, Karim madah ke industri dagang temuai kapal dagang temuai majak ngerembai nengah lebih 300 penatai kapal dagang temuai enggau lebih dua juta penumpang dirikod di Asia Tenggara ba taun 2023 ti disadang manggai 3.19 juta ba taun 2029.
Nerang silik agi, iya madah ke Sarawak ngembuan pengulih ti besai ba sektor nya, tang perintah agi begunaka pengawa ngemanah perengkaguna palan penyangkai kapal enggau servis logistik.
“Tu dikena nentuka proses tama enggau pansut penumpang ulih bejalai enggau lanchar.
“Opis menteri aku diatu benung berandau enggau operator kapal dagang temuai ari Singapore ngambika ngemasukka Kuching enggau Miri nyadi palan temuai ngetu jemah,” ku iya.
