Album Jera betemu enggau peminat Januari 2020

KUCHING: Peminat Lydia Richard engka enda sabar nganti penatai album baru ari iya ti diberi nama ‘Jera’.

Nitihka perambu ku Lydia, album ‘Jera’ deka dikeluar ujung bulan Januari 2020.

“Album ‘Jera’ ngundan tujuh buah lagu dikeluar di baruh perabung Twin Tone Production ti diketuai Allen Nyuntai (Producer).

“Enti sema nadai penanggul, album tu deka dikeluar sereta betemu peminat ti rinduka lagu-lagu Iban ujung bulan Januari taun baru,” ku iya lebuh dirandau Suara Sarawak, tadi.

Kelimpah ari nya, iya madahka haribulan ngelancharka album ‘Jera’ deka dipadah ngagai mensia mayuh nengah media rama.

“Endur enggau haribulan pengawa ngelancharka album tu deka ditesau kami ba media rama enda lama agi.

“Aku ngarapka album ‘Jera’ ulih diterima peminat sereta ulih enggau orang ngeruh ai ba Anugerah Carta Sapa Juara (ACSJ) ba taun baru.

“ACSJ udah mujur ngangkatka industri muzik Iban ngagai tikas tinggi agi lalu tu meri peransang ngagai kami ti ngemeranka pengawa belagu,” ku iya andal.

Naka diatu ku iya, promo lagu ‘Jera’ udah ulih dipeda nengah ‘channel’ Twin Tone Production ba ‘youtube’.

“Bala peminat mega tau ‘subcribe’, ‘like’ enggau ‘share’ nengah ‘channel’ nya kelai sukung tegut sida ngagai lagu enggau album baru aku tu.

“Kita mega endang diperansang meli album original sereta nyeliah chelak tiru ngambika industri muzik enggau seni kitai Iban majak mansang baka orang bukai,” ku iya.

NGASUH ATI RINDANG… Entara album Lydia Richard

Suara Sarawak