Alimakha FC Champion Mangkuk Main Bol P 205

SARATOK: Tim Alimakha FC ari Saratok menggi gelar champion ngalahka tim DF 17 ari Kabong ba renggat kepenudi Pekit Main Bol Mangkuk P 205.

Pekit diatur Kelab Lumba enggau Rekreasyen Awik begulai enggau Kaban Komiti Besai Pekit Main Bol P 205 di Padang Kaunsil Pelilih Saratok (KDC) ditu kena 27 April tu tadi.

MP Saratok Ali Biju lebuh dirandau Suara Sarawak madahka diri temegah meda pemujur atur pekit taja pekit keterubah diatur di menua nya pengudah menang bepilih PRU Ke-14.

“Aku lantang amat ati meda atur pekit lanchar lalu nerima mayuh sukung enggau timbal chukup manah sekalika ari tim ti bepekit tauka penatai rayat pupu bansa ke diau besemak.

“Sida datai kitu meri sukung ngagai tim ti bepekit berebutka gelar champion seraya nanggam kaul begulai enggau pangan diri. Tu ngasuh aku temegah,” ku Ali ke mega Adun Krian.

KAMI CHAMPION… Tim Alimakha FC ari Saratok menggi gelar champion Pekit Main Bol P205 keterubah diatur.

“Nyangka udah tu kitai ngatur pekit ngena pekit liga enggau timpuh bemain enam bulan pengelama lalu bungkur tim ke main mega deka besai enggau mayuh agi.

“Tu deka meransang bala pemain gagit sereta ransing agi bemain kelimpah ngiri enggau bekunsika penemu sereta peneleba bemain seraya ngisi jam bala nembiak ari tebasau ngapa. Tu mega ulih nyeliahka sida ari ngereja ulah enda menuku baka gian dadah enggau penanggul rama bukai.

“Tuju kitai deka nempa bala pemain ti bisi kualiti lalu tau dilatih bala pemain profesional bukai kelimpah nerenak gaya idup bepengerai, ngemeranka main enggau lumba sereta nempa disiplin diri,” ku Ali madah nyemetak.

Ngelansa pasal pekit, tim DF 17 alah 0-3 ngagai Alimakha FC, ba penuduk kedua nerima perais mata duit RM1500 seraya tim Champion nerima RM3000 disempulang trofi enggau midul.

Tim Besapai FC (Kabong) ba penuduk ketiga nerima perais mata duit penyampau RM750 seraya penuduk keempat (RM500) enggau perais sagu ati RM150.

NYULUT… Bermawi (kanan) dipadu nyadi pemain pemadu nyulut ke mega Tuai Raban Main Alimakha FC begambar enggau Ali (kiba).

 

NGUJI BARU… Tim DF 17 ari Kabong netapka juluk ngerampas gelar champion ba pekit taun baru.

Suara Sarawak