SIBU: Penyandang Dun Katibas, Datuk Seri Ambrose Blikau Enturan madah enda ngetanka penuduk iya maya Pengawa Bepilih Nengeri Ke-12 (PRN12) tu.

Pekara nya dipadahka PBB Pampang Katibas nengah sebengkah penerang ba media rama iya.

Pia mega, iya mega udah madahka diri deka pinchin enggau nyurutka diri ari politik.

Blikau ti udah gawaka rayat pengelama lebih 40 taun ba sitak Dun Katibas kala madahka pekara nya kenyau ari PRN-11 ba taun 2016.

“Iya udah nyadi pengari rayat kenyau ari beumur 26 taun lalu keterubah iya mangku pengawa nyadi Menteri Muda ba taun 1987.

“Sekumbang nyadi pengari rayat ba Dun Katibas, iya udah bebendar mai buah pemansang ngagai rayat ditu.

“Tu nyengkaum pemansang jalai raya ari Song/Ngungun, Song/Kapit, Banjor/Makut enggau Makut/Engkuah.

“Pia mega, projek jalai raya ari Engkuah terus ke Ulu Katibas udah diperambu iya begulai enggau niang Tan Sri James Jemut Masing,” ku penerang nya.

PBB Pampang N.62 Katibas madah, projek pemansang mengeri baka Song Waterfront, gelanggang futsal, balai, JPM, pasar basah enggau pasar baru ti udah dikemendar enggau agih belanja penyampau RM4 juta.

Penerang nya mega madahka Blikau udah ngagihka bemacham projek mit ngagai rumah panjai enggau bantu ngagai Gerempung Apai Indai enggau Pengajar (PIBG), sekula enggau Gerempung Ukai Dikuasa Perintah (NGO).

Ku penerang nya, Blikau ukai semina udah mai projek besai ngagai peranak Katibas tang mega bemacham pemansang ti udah nyerungkai peluang ba pemansang ekonomi sereta perengka guna baka Bomba, Klinik, Sekula enggau Bank Simpanan Nasional ngambi rayat ba sitak Katibas muntang agi bejalaika pengawa.

“Iya mega udah bejalaika projek kuasa karan solar baka Skim Altenatif Kuasa Karan Menua Pesisir (Sares) ngagai menua ulu enggau Skim Bekal Kuasa Karan Menua Pesisir (Res) ungkup sitak ti ngembuan sambung grid kuasa karan,” terang iya.

Sekumbang masuk dalam dunya poltik, Blikau udah mandangka penaluk ngagai parti.

“Pekara tu nyata dipeda lebuh politik Sarawak charut ba taun 1987, taja penyakal kuat lebuh nya tang iya enda kala beginsit ari PBB.

“Nya kebuah, pekara baka tu udah dibantai enggau diajar iya ngagai kaban PBB Pampang Katibas.

“Ari nya, iya kala dichiri nyadi Sekretari Besai PBB, MKT PBB Bapa enggau kala megai sekeda portfolio nyadi Menteri Muda ba Perintah Sarawak.

Penerang nya madah, kaban PBB Pampang Katibas temegah ati enggau tuai ke ulih ditunda baka iya lalu sida chukup bebasa ke iya nyentuk meri sukung tegut enggau mujur menang pantai ngagai PBB pengelama dua kali bejurut di Dun Katibas.

Kelimpah ari nya, taja kaban PBB Dun Katibas sinu ninga berita iya deka nyurutka diri ari politik tang sida tetap nerima pemutus iya nya.

“Kami meruan ingatka jaku tangkan ari iya ngagai tuai ke baru ti deka nyilih iya ila mesti dipilih ari kaban PBB Pampang Katibas empu ngambi nyamin penegap politik.

“Enggau penuh basa sereta sinu ati, kami semua kaban PBB Pampang Katibas deka meri selamat pinchin lalu besampika Blikau gerai belama.

“Terima kasih Blikau enggau indai kami, Datin Sri Marie Therese Mathias.

“Jaku tu ari kami semua kaban PBB Pampang Katibas enggau mega rayat di sitak Katibas,” ku penerang nya.