Anak Dayak: Terima kasih Petronas

“Aku berasai gaga laban bantu ti diterima aku tu ila ulih ngelempungka tating belanja apai aku ngiga belanja dikena nupi kami menyadi.”

KUCHING: Raban anak Dayak ke bisi nerima bantu ari Petronas berasai betuah laban dipilih nerima bantu belanja lalu pemeri nya deka nyadi peransang penyulut ngagai sida nyapai pemujur ba pelajar.

Siku anak indai tunggal Esther Saka 16 taun ari Bintulu entara penerima bantu ari Petronas.

Ku Esther ti benung belajar ba Pom Empat di Maktab Rendah Sains Mara (MRSM) Sarawak, iya bisi lima iku menyadi lalu iya ti pamadu biak agi sekula ba SJK Sebiew China di Bintulu.

“Aku dipilih nyadi penerima bantu belanja tu laban kami menyadi lima iku semua agi besekula.

Esther Saka

“Pia mega, penatai pemisi indai aku RM1,500 sebulan enda tetangkupka ungkus pelanja sekula kami ti mar,” ku iya.

Esther sempat dirandau pemberita Suara Sarawak lebuh nerima pemeri belanja ari Petronas ba sebuah hotel tebilang ditu, kemari.

Iya nerima pemeri belanja baruh skim Budi Petronas laban nyulut ba pelajar teulihka pointer 3.03.

“Aku berasai gaga laban udah tu ila indai aku enda ibuh ngirum belanja lebih dikena aku besekula,” ku iya.

Kelimpah ari nya, Rollerwinsthie Wilson 16 taun mega berasai gaga lebuh nerima pemeri belanja ari Petronas tu.
“Kami sebilik bisi lapan iku lalu ngandalka apai aku aja ngiga belanja.

Rollerwinsthie Wilson

“Aku berasai gaga laban bantu ti diterima aku tu ila ulih ngelempungka tating belanja apai aku ngiga belanja dikena nupi kami menyadi,” ku iya ti madah kediri datai ari Kapit sekula ba MRSM Sarawak mega.

Nangkan nya, Mikswill Dato Lintong 20 taun ari Baram iya berasai ditulung laban Petronas meri pemeri belanja dikena iya sekula.

“Aku besekula ba Automotive & Welding Institute of Sarawak (Awisa) di Demak Laut.

“Lebuh nerima pemeri belanja tu aku berasai disukung sereta temegah laban dalam pemayuh bala bukai ti minta aku siku ari sida,” ku iya madah.

Lalu, Nason Lambi 19 taun ari Miri madah pemeri belanja ti diberi tu ila dikena iya ngatur belanja nyuwa rumah dikena iya sekula.

“Apai aku pinchin nyadi semina ngarapka indai aku ngiga belanja kami sebilik.

“Pemeri belanja ti diberi tu ila ulih ngelempungka tating belanja rumah suwa laban aku diatu benung diau enggau bala aya di Kuching ditu,” ku iya ti madah kediri benung belajar ba Politeknik Kuching ngambi Kejuruteraan Proses Petrokimia.

Bisi 149 iku nembiak bulih pemeri belanja ari Petronas ti dibagi ngagai tiga bengkah sekim iya nya Program Pemeri Belanja Pelajar Petronas (PESP), Pemeri Belanja Vokasional Institusyen enggau Pematih (Vista) enggau Budi (nembiak ti nyulut ba pekara belajar Sains).

 

Mikswill Dato Lintong

 

Nason Lambi