MIRI: Menteri Muda Kaunsil Kandang Menua, Datuk Dr Penguang Manggil minta peranak menua pesisir enggau menua ulu anang irau laban mayuh bantu udah dilanggur dikena mantu sida napi penusah sekumbang Atur Tagang Pejalai (PKP) nyentuk 14 April tu.

Iya ti mega Adun Marudi madah, kelimpah ari Pakej Peransang Ekonomi Prihatin Rayat ti dibantaika Menteri Besai apin lama, Perintah Sarawak mega mantaika Bantu Khas Sarawakku Sayang ungkup rayat ba menua tu.

Nya kebuah, iya minta rayat sabar enggau nitihka atur PKP dikena nyaup pengawa perintah nagang Covid-19 ari majak ngerekai.

“Diau jenuh ba rumah, enti bisi kebuah aja pansut baka bebelika utai diguna lalu ngenyauhka takah enggau pangan diri lebuh ba luar ngambi munaska rantai igi penyakit tu.

“Kita mega ditagang begelumur nyengkaum semua pengawa besembiang ba masjid, surau, gerija, tepikong enggau rumah sembiang tauka palan bukai,” ku iya ba sebengkah penerang, ditu keamri.

Pia mega ku iya, orang bumai enggau pekebun ba kandang menua pesisir dipinta bejimat taja ulih ngereja pengawa baka selama.

“Jaga pemeresi diri sereta takah enggau pangan diri baka suah masu jari ngena sabun enggau ngena hand sanitizer sereta sengkabung mua,” tandu iya.

Berebak enggau nya, Penguang meri besai terima kasih ngagai semua raban gawa ba luan ti udah bebendar gawa nagang pengerekai igi penyakit tu.

“Aku ngarap, sida ke benung gawa semampai dilindung enggau sabar bejalaika pangku pengawa sida,” ku Penguang.

Kelimpah ari nya, iya nangkan semua ketuai komuniti enggau ketuai raban bansa ngambi semampai berandau enggau Komiti Penyangga Penusah Ngenyit Pelilih iya nya ba opis pelilih, piak polis enggau opis pengerai enti sema bisi tanya tauka bisi penanggul ba genturung pendiau.