KUCHING: Rayat enda ibuh irauka diri suntuk bekal pemakai pemanjai timpuh Atur Tagang Pejalai (PKP) laban Perintah Sarawak seruran mantu rayat ba nengeri tu.
Menteri Dagang Dalam Menua enggau Pekara Pengguna (KPDNHEP) Datuk Alexander Nanta Linggi madahka mayuh macham atur dipejalaika Perintah Sarawak enggau Perintah Besai ngambika rayat enda putus bulih bantu ke patut rambau PKP tu.
Iya ti mega Kaban Parlimen Kapit madahka iya begulai enggau Adun Bukit Goram Jefferson Jamit sereta Adun Pelagus Wilson Nyabong deka meri bantu ngagai rayat ba sitak dipegai sida empu.
“Pia mega ba Song, aku udah berengkah ngatur bantu ke sama nengah Palan Servis Parlimen Song ngagai semua rayat ba sitak nya.
“Timpuh PKP tu engka agi panjai tang udah bisi macham atur bantu ke sama ngagai rayat ngambika semua nerima bantu pemanjai timpuh tu,” ku iyalebuh dirandau Suara Sarawak, ditu tadi.
Nangkan nya, iya madahka seruran ngemeratka pengelantang peranak Kapit pemanjai PKP tu taja ngembuan tanggungpengawa ti besai ba KPDNHEP.
