Anang kesal ati ninga utai meletup

KUCHING: Mensia mayuh ba genturung Kampung Senari, Geobilt, Sejingkat, Muara Tebas enggau Bako dipinta ngadang sereta enda kesal ati enti sema bisi ninga munyi utai meletup.

Kepala Polis Pelilih Kuching P/ACP Awang Din Awang Gani madahka munyi nya datai ari Latih Amal Letupan Gis di Independent Oil Terminal Sdn Bhd Senari Kuching kena 22 Ogos tu.

Ku iya, pengawa nya diatur nitihka perintah MKN20 enggau MKN21 lalu tuju latih tu diatur bejalaika Emergency Respons Plan-ER’ sereta koordinasyen entara ejensi bekaul dia.

“Kelimpah ari nya, latih tu dipejalai dikena nguji komunikasyen entara ejensi sereta opis menteri lebuh napi penusah ngenyit sereta pekara ti tau ngeruga pengelikun mensia mayuh,” ku iya.

Awang bejaku munyi nya ba aum pemberita di Indu Opis Polis Pelilih (IPD) Kuching ditu, tadi.

NERANG… P/ACP Awang Din Awang Gani (kanan) ba aum pemberita di Indu Opis Polis Pelilih (IPD) Kuching ditu tadi.

Ku iya, latih tu berengkah diatur ari 21 ngagai 23 Ogos nyengkaum bengkel enggau licha sebedau pengawa ngeletup dipejalai lemai 22 Ogos.

“Kami deka ngelekatka sirin sebedau pengawa ngeletup nya dipejalai ngambika mensia mayuh ulih ngadang.

“Bala penguna jalai alun di Demak, Senari, Bako enggau Sejingkat dikearap ulih nitihka atur ditetapka polis ti gawa maya nya,” ku iya.

Latih tu ngaul kerejasama entara IPD Kuching enggau Kaunsil Pengelikun Menua Opis Menteri Besai sereta Independent Oil Terminal Sdn Bhd Senari Kuching.

Bisi 26 ejensi bekaul ngulu pengawa tu nyengkaum Raban Soldadu Malaysia (ATM), Opis Penerang, RTM, Unit Komunikasyen Sarawak (Ukas), Opis Nyaga Rampa Menua (Jas), Telekom Kuching enggau ke bukai.

Pengawa ngeletup gis deka berengkah pukul 6.00 pagi nyentuk 5.00 lemai.

Mensia mayuh dipinta bela ngadang sereta nyeliah diri ari nengah jalai besemak enggau palan latih nya.