Anang nangi besemekih ba dagang kraf jari

KUCHING: Bepun ari pengerindu pengawa nusuk manik diatu Kamila Galau sebagi ari indu Iban ti chakah ngemeranka pengawa nya dikena nambahka penatai pemisi.

Peranak asal ari Rumah Joseph Jarau, Tanjung Bekakap, Batang Lebaan, Sibu tu keterubah iya semina ngemataka bala bukai sebedau ngatur singkang ngaga marik ari leka manik.

Ba iya, iya nemu maya hari tu penyampau orang ke ngaga marik ngena manik endang manah ti mega bepun ari asil pengelandik jari nya majak dikerinduka ukai semina bansa Iban tang bela nyadi kereban penganta bansa bukai.

“Keterubah endang rindu meda bala bukai begagaka asil ari nusuk manik sebedau aku nguji ngaga kediri.

“Tang ba taun 2017, aku berengkah ngining pengawa tu sebedau iya dikemeranka aku nyadi siti jalai ngasilka penatai pemisi,” pia ku iya madah maya berandau enggau pengarang ba Sarawak Agrofest 2019 ke diatur di Stadium Negeri, Kuching, kemari.

Bekunsika pengerindu iya nya, Kamila nandu baru, iya enda nangi besemekih enggau bala bukai ti ngemeranka pengawa nya laban ba iya sesebengkah asil jari nya enda sama enggau pangan diri.

Iya madah, asil jari iya nyangka bisi enda sebaka enggau orang bukai lalu nya nyadika bida entara sida.

“Diatu kitai meda ba dini-dini endur maya bisi pengerami tauka karnival mayuh orang bejual asil pengelandik jari ari manik.

“Taja pia nya ukai nekul laban asil enda sebaka enggau pangan diri,” ku iya nerang nyemetak.

Suara Sarawak