MUKAH: Raban Polis DiRaja Malaysia (PDRM) Mukah meri jaku tangkan ngagai mensia mayuh anang sesekali nguji ngerembaika berita bula bekaul enggau kes positif Covid-19 lebih agi di Mukah.
Ketuai Polis Pelilih Mukah DSP Jimmy Panyau madah nyema ditemu bisi orang nguji ngerembaika penerang bula, penerang ke enda betul tauka selebubu ngapa pasal Covid-19, sida nya deka diteritka enggau atur undang-undang.
“Kenyau beberapa minggu ke udah di Mukah, bisi sekeda raban berani ngerembaika berita bula pasal kes Covid-19 nengah chara sebut mulut u tauka ba media rama.
“Tambah mega bisi penerang, komen enggau info ke dibantai ngagai raban ketiga nyengala nadai diperati dulu pengamat ba raban Opis Menteri Pengerai Mukah,” ku iya madah ngagai Suara Sarawak.
Nya alai, ku iya ulah ke enda mereti baka nya tau ngasuh orang bukai takut ketegal penerang ke enda betul.
“Bela ngasaika pangka baka palan pelajar ba Mukah laban bisi sekeda apai indai enggau pengibun ngaga pemutus enda berani nganjung anak nurun ke sekula.
“Kelimpah ari nya bisi ngaga pemutus kuarantin kediri ukai ari asuh KKM.
“Udah nya bisi kedua raban pengajar enda ngemendarka nembiak sida nurun ke sekula laban nangika nembiak nya mai penyakit Covid 19.
“Tang kebendar KKM enda kala mantaika sebarang gerah pasal kuarantin ungkup bala nembiak bekaul,” ku iya.
