KAPIT: Apai indai lebih agi ba menua pesisir patut ransing agi nyengulaka anak awakka ulih nempa sida nyadi orang ke bepenemu sereta ulih besemekih jemah ila.
Kaban Parlimen Hulu Rajang, Datuk Wilson Ugak Kumbong madah nengah penemu ke diulih ari sekula nya dia ulih mantu sida nyapai tikas pengidup ke lebih meruan dudi hari.
“Manggai taun 2020, menua kitai begunaka orang ke landik ba semua sukut. Nya alai, apai indai meseti ransing nyengulaka anak diri ke pemaik dudi hari,” ku iya.
Iya madah munyi nya rambau bejadika Aum Apai Indai Nembiak enggau Pengajar ba SMK Baleh apin lama ke udah.
Berebak enggau nya, Ugak ngelalau apai indai awak enda betegalka nadai jalai alun enda nganjung anak ke sekula.
Kenu ku iya, Kapit udah diberi agih RM1.5 bilion dibaruh ejensi URDA dikena ngemansangka menua tu nyengaum ungkup jalai sepiak kanan Batang Baleh dipeda bisi jalai alun ke benung digaga.
Pia mega, agih RM200juta dikena ngemansangka jalai enggau jematan mua ke kiba Batang Baleh ke Gaat, siti pemansang baru ke deka diatur ba Batang Baleh,”ku iya
Nangkan nya, Ugak ngelalau mensia mayuh anang mudah arap ngagai orang luar ke nguji mai gawa nyema sida nya enda dikelala.
“Anang enda bjimat ba dunya digital kemaya hari tu kelebih agi pengawa nipu ke udah dipeda kitai bisi nyadi di Kemboja enggau Liberia nuntung rayat ari menua tu apin lama ke udah,”ku iya
Iya mega meransang bala nembiak ke benung begiga pengawa anang enda mansik batang pengawa ke dipinta enggaika kena tipu orang ke deka nguji beambi ulih.
Ngelansa pekara bukai, Ugak ngelalau mensia mayuh patut nitihka atur tagang nginsap ba palan makai dikena nyeliahka sida ari kena ukum.
Kelimpah nya, iya madahka ketuai ari Sarawak endang naka ulih ngetanka hak menua tu bepelasarka Sempekat Malaysia 1963 nengah Gabungan Parti Sarawak (GPS), ku iya.
Ba pengerami nya, Ugak bisi nyuaka bantu RM15,000 sereta pemeri ari Sapit Kepala Menteri Datuk Amar Tan Sri DR James Jemut Masing penyampau RM10,000.
Sama bisi datai, Sekretari Politik ngagai Kepala Menteri Sarawak, Nicholas Kudi Jantai enggau bala bukai.
