KUCHING: Penumbuh palan pelajar tinggi tikas entarabansa ba Sarawak deka nentuka menua maju kelebih ari sukut nempa pengereja landik.
Kepala Menteri Datuk Patinggi Abang Johari Tun Openg madahka penumbuh palan pelajar tinggi entarabansa baka Swinburne Sarawak di Sarawak kenyau ari 20 taun ke udah nempa mayuh nembiak ti bisi kualiti ngambi nangkup peminta industri.
“Perintah nadai penanggul nembiak nampung pelajar ngagai menua luar lalu kami nyukung pengawa nya dikena nambahka peneleba sida.
“Tang mayuh nembiak ti udah tembu belajar milih diau ba menua luar ari pulai ke menua diri lalu pekara tu pulaika pengerugi ngagai kitai,” ku Abang Johari.
Abang Johari mansutka jaku nya dalam aum pemberita nyerumba Pengerami Makai Taun Ke-20 Swinburne Sarawak, ditu kemari.
Nambahka nya, iya berasai gaga laban lebih ari 90 graduet milih diau ba menua tu pengudah abis belajar lalu gawa enggau pemain industri besai kelimpah numbuhka dagang diri.
“Penumbuh kampus Swinburne di Kuching udah ngubah pemansang pelajar tinggi lalu ngembuan tanggung pengawa besai nentuka rayat ti bisi pengelandik mengkang diau ditu lalu besaup nempa pemujur ba Sarawak.
“Sebedau penumbuh Swinburne, apai indai mesti nganjung anak sida ke menua luar lalu tebal agi, apai indai madahka pemutus nganjung anak sida ke menua luar nya begunaka besai belanja.
“Tang diatu sida nadai agi nganjung anak ke menua luar laban palan pelajar tinggi tu nyendiaka pelajar Australia ti diaku tikas entarabansa ba Sarawak.
“Pia mega, palan pelajar tinggi tu nyendiaka peluang nampung pelajar ngagai menua luar nengah Program Besilih Nembiak tauka betukar kus,” terang iya.
Terang iya, pelajar nya agenda besai dalam pemansang Sarawak baka diaku ex-Kepala Menteri Pehin Sri Abdul Taib Mahmud ti udah numbuhka palan pelajar tinggi nya 20 taun ke udah.
“Sida udah ngemansangka budaya, ekonomi enggau dagang menua nengah perengkaguna, pemakai, pemerindang enggau dagang temuai nyengkaum mengeri Kuching nyadi kota metropolitan enggau pemisi palan pelajar tinggi tu.
“Meri pengaga ati ngagai Swinburne Sarawak laban udah nyulut enggau nempa pemujur besai dalam pemansang menua nengah pekara pelajar enggau pansik ungkup pemaik rayat menua tu,” terang Abang Johari.
