SIBU: Penatai apai indai ti dikesayau (Panas Baong enggau Catherine Kalat) nambah pengeransing siku atlit angkat berat Zon Tengah (Sibu, Mukah, Kapit), Samuel Fernandez Panas, 17.

Badang biak ti datai ari Kapit mujur ngulihka dua midul iya nya midul emas enggau pirak ba hari keterubah Lumba Sarawak (SUKSAR) Ke-3 Sibu 2023 ti diatur ba Balai Gerempung Melayu Melanau, Sibu ditu, kemari.

Midul emas nya diulih iya ba kategori snatch 55 kilogram (kg) lalu midul pirak diulih iya nengah kategori clean & jerk (55 kg).

“Aku chukup gaga sereta tepantup ati bulih dua midul ba lumba sekali tu.

“Penatai kededua apai indai aku ngasuh aku ransing agi belumba,” ku Samuel rambau dirandau Arena Suara Sarawak.

Iya ngaku penyulut diri mujur ngulih dua midul nya mandangka pengepuh iya belatih ngelama tu lalu nya mansutka asil.

Taja pia, Samuel ngarap penyulut nya deka ngasuh bala bakih iya ti ngarika tim Zon Tengah ransing agi belumba.

Lumba angkat berat deka ditampung sepanjai hari tu (kemari) ti mungkur kategori bebida ungkup lelaki enggau indu.