KUCHING: Kaban antropologi British, Dr. Monica Janowski enggau lebih 30 taun peneleba mansik di Sarawak deka meri licha ke diberi nama The Chinese Dragon (Lung) in Sarawak di Muzium Budaya Borneo ditu, pagila.
Iya deka bekunsika simpul asil pansik pasal komuniti China ba pemesai reti enggau guna naga China kelimpah jerita enggau pegarap naga China ti dikaul enggau orang Borneo ke bukai.
Monica madah, iya deka nusui pasal pekara kaul entara naga China enggau landskap sereta alir ai.
“Aku deka mantaika sekeda utai ditemu pasal pengarap orang China ba naga nya enggau chara sida bekenang enggau pengarap orang asal pasal jelu ai,” terang iya.
Iya madah ke diri udah mansik pasal pengarap jelu ai ke dikumbai naga ba mayuh raban etnik di Sarawak tu kenyau ari taun 2017, lebuh iya nyadi pemansik di Muzium Sarawak, dikena nyikap Muzium Budaya Borneo ke baru.
“Aku udah ngeluarka artikel pasal naga tanah tinggi enggau naga Iban dalam Jurnal Muzium Sarawak enggau empat artikel dalam Harian Dayak ba suku keterubah 2023, dalam siri dikumbai ‘The Naga Moves’,” ku iya madah lenak.
Ungkup rikod, Monica udah mayuh ngaga pansik pasal naga ai dalam bansa Kelabit enggau raban bansa bukai di Sarawak nyengkaum Kayan, Kenyah, Berawan, Penan, Bidayuh, China enggau Melayu kenyau ari 2017 suba.
Pansik digaga iya di Sarawak kenyau ari 1986 udah bisi asil nengah artikel ti dikeluar baka The Forest, Source of Life: The Kelabit of Sarawak (British Museum and Sarawak Museum, 2003) enggau Tuked Rini, Cosmic Traveller: Life and Legend in the Heart of Borneo (NIAS Press and Sarawak Museum, 2014).
