KUCHING: Kaban Parlimen Bandar Kuching, Dr Kelvin Yii madah iya tekenyit ninga pasal Kaban Kunsil Nengeri (Adun) Padungan Wong King Wei pansut ari Parti Tindakan Demokratik (DAP).

“Amat enda nemu nya aku tekenyit ninga berita nya kemari (Hari Minggu)…siku orang ke dikangau aku menyadi, ngaga pemutus nyurut diri ari politik,” ku ketuai DAP nya dalam Facebook iya sehari tu.

Iya madah diri udah bekaling enggau Wong kenyau begulai dalam politik lalu sida suah betukar penemu, berandauka polisi, bekerejasama sereta bekunsi juluk ati sentang pendiau enggau pengelantang rayat.

“Politik endang bisi surut mansang, pedis nyamai, pait manis tang iya beguna nengah semua tu, iya mega nyadi palan endur belajar, peneleba enggau peluang ungkup pemansang rayat.

“Nadai orang ti enda nemu salah, pelasar ke manah tauka taja bisi besengki jaku, tu mih maya endur kitai berunding baru awakka terus belajar, angkat lalu madahka buah penemu ke manah nyadi nya chara aku gawa,” ku iya.

Nya alai, Yii madah iya enggau bakih bukai deka terus bejalaika pengawa enggau manah.

“Enggau tu, aku besampika pemujur iya, Wong King Wei. Arap Tuhan terus merekat iya ba pengawa ti deka datai.

“Naka tu, aku ngarap deka terus bekerejasama ke pemaik konstitusyen kami di Padungan enggau Bandar Kuching,” ku iya.

Sebedu tu, King Wei madah diri pansut ari DAP lalu enda ngetanka penuduk Dun Padungan ba Pengawa Bepilih Besai Nengeri Ke-12 (PRN12) ila.

Iya mega madah ngemaduka diri nyadi Mandal Chairman DAP Sarawak, ngetu ari semua tanggungpengawa bukai dalam parti nyengkaum nyadi kaban DAP tekala nya.

Pemutus nya digaga ku iya, laban udah lenyau pengarap sereta asa bekaul enggau pemutus sereta chara politik DAP Sarawak.