BA genap pengawa dikereja, udah tentu kitai deka pekara nya bisi asil enggau penguntung sekali ke nya ba diri empu tauka orang bukai.

Baka nya mega utai dikedeka Sifu Pink tauka tampak agi dikangau Pengajar Ajat.

“Keterubah muka kelas ajat tu, endang juluk ati aku deka ke pengawa dikereja aku tu meri pemaik sereta orang bukai ti datai belajar bulih penemu enggau ulih ngansah pengelandik diri.

“Puji Tuhan, majak mayuh orang rindu belajar ngajat, chukup manah pengawa baka tu ngambi bisi ditampung rebak dudi,” ku Valentine Bala tauka tampak agi dikangau Pengajar Ajat.

Kelas ajat ti udah dibuka ngagai semua nadai ngira nembiak enggau orang besai tuai udah mansutka asil.

Ukai semina nya aja, kelas tu mega semampai ditapatka mensia mayuh, pupu bansa rindu belajar.

BULIH ASIL

“Ari kelas ajat tu, sida nyau nemu ngajat enggau chara ti betul ari sukut kepai jari enggau ayun lundai sereta liuk tubuh.

“Udah nya tadi, sida dibai aku ngajat maya bisi pengawa baka pengerami melah pinang ngambi sida ngasaika peneleba ngajat ba atas panggau.

“Tu mega tau ngansah pengelandik enggau pengandal sereta pemerani sida ngajat ba mua bala mayuh.

“Bala nembiak ti bisi diajar aku mega kala masuk bemacham pekit mandangka ajat asal baka Kids Got Talent di Pustaka Sibu lalu temegah ati sida bulih gelar champion.

“Tu meh utai ku aku, sida ti belajar ngajat enggau tanda asal bukai deka bulih pemaik enggau penguntung.

“Pengawa tu enda nyalah baka bumai, nyau ke lama bulih ga asil,” ku iya tuchum.

Nampung randau, Pengajar Ajat nya madah, pupu bansa rindu belajar ajat asal kitai Iban baka bansa India, China, Melayu, Murut, Melanau, Orang Ulu enggau ke bukai.

Ku iya, ukai semina bansa Iban aja ke datai belajar ditu tang mega bansa bukai.

Tebal agi ku Pengajar Ajat nya, mayuh penyereta rindu belajar ngajat enggau ajat liuk lundai.

“Aku mega bisi ngajar tanda Orang Ulu ungkup ba studio. Enti baka ba sekula, aku mayuh ngajar bemacham tanda nitih syarat pekit baka tradisional Melanau, Bidayuh, tanda kreasi, tanda kreatif etnik enggau tanda Melayu.

“Tanda tu dipandang ngena chara bepekit ba sekula sekali ke renggat bagi menua enggau nengeri.

MEDIA SOSIAL

“Aku mega suah bekunsi gambar ngajar orang ngajat ba Facebook enggau Instagram.

“Kebuah pia laban aku nemu ari nya orang ulih nemu pengawa dikereja aku kelimpah ulih narit orang bukai datai belajar.

“Ba pelasar TikTok, aku suah mantaika video ngajar bala nembiak ngajat,” ku iya.

Nya alai ku Pengajar Ajat, mensia mayuh ulih nemu berita tauka pengawa pemadu baru ari iya nengah TikTok Sifupink_official, Facebook Sifu pink enggau Instagram Sifupink_official.

Ditanya pasal pemanah media rama kelebih agi TikTok, iya madahka media sosial endang besai bungkur sereta meri mayuh pemaik enti dikena enggau chara ti betul.

“Chukup mayuh pemanah media sosial kemaya hari tu enti dikena enggau chara ti menyana sereta betul.

“Baka ba TikTok nya, ukai semina orang ba Sarawak enggau Malaysia aja ulih meda, tang serata dunya.

“Ari pemayuh orang ti meda, udah tentu bisi siku dua deka betanya enggau ngiga kami endur belajar ngajat.

“Nya ku runding ati aku, nya kebuah aku sigi semampai nitihka pekara ke nyadi diatu baka ngembuan aplikasyen digital tu,” terang iya.

Sebedau nyimpul randau, besai pengandal Pengajar Ajat ngarapka rebak baru ngembuan pengangkun sereta ngetan main asal kitai Iban ngambi enda punas disegang arus pemansang dunya ti majak deras.

“Kitai patut begempung lalu angkun sereta bisi pengeran ngetanka main asal ngambi identiti bansa enda majak lenyau.

“Nengah pengawa belajar ngajat enggau chara bukai ti tau ngetan main asal tu kitai ulih nentuka identiti meruan tegap enggau majak dikelala dunya.

“Nya kebuah, rebak biak patut belematika pekara tu enggau manah ngambi pesaka bansa kitai meruan gah enggau pegari dataika jemah ila.

“Ibun manah main asal kitai, rebak biak meh dikeandal nampung legasi kami tu ngetan adat enggau main asal kitai Iban,” ku iya nyimpul kenang.