Ari ‘Mentulau’ nyadi palan industri besai

Tebilang enggau nama minyak enggau gis Bintulu kelia kebendar beasal ari sebuah kampung orang berikan ngiga asil tasik baka undang, chenchaluk, enggau belachan.

Ku jerita, Bintulu tu suba sebuah menua ti angat sereta enda likun kelebih agi ngagai sida ti datai ari menua luar.

Bala sida ti tuai madah nama asal Bintulu iya nya ‘Mentulau’ diambi ari jaku Melanau ti bereti ‘mumpung pala’.

Tang ‘mentulau’ tu semina nuju ngagai munsuh ti ngeruga pengelikun diri enggau ruang bilik aja.

Pengudah dipumpung, pala nya deka disalai lalu disimpan nyadika tanda kuasa sereta pemerani bujang berani.

Palan bebeli barang Bintulu.

Bisi mega ba jerita bukai ti madah nama Bintulu tu beasal ari jaku ‘metuk ulau’ jaku Melanau ti bereti ngambi pala lalu dibuai ba sungai tang pengamat jerita tu enda nyemetak ditemu.

Diatu, Bintulu ukai agi nyadi palan ‘mentulau’ tang nyadi palan pengerembai industri minyak enggau gis lalu jerita ‘mentulau’ lenyau diseruyut jeman ketegal pengulih nemu ‘emas chelum’ nya dia.

Diau ba tengah Nengeri Sarawak, Bintulu diangkat nyadi Bagi Menua di Sarawak kena 1 Januari 1987.

Nitihka Portal Rasmi Opis Bagi Menua Bintulu ketegal aktiviti nemu minyak enggau gis, Bintulu lalu nempuh penumbuh industri ti mansang enggau jampat.

Pia mega, Bintulu lalu nyadi palan mengeri penumbuh industri di Sarawak taja semina ngembuan pengeluas 12,166 kilometer pesegi aja.

Pengkalan Samalaju Bintulu

Kelimpah ari nya, Bintulu nyadi Bagi Menua ke-9 ba Sarawak lalu betakah enggau Bagi Menua Sibu, Miri, Kapit sereta Mukah.

Ngembuan pemayuh peranak 255,400 iku, Bintulu bisi dua pelilih menua, Bintulu enggau Tatau lalu Sebauh nyadi sebagi ari pelilih mit dia.

Empas pemansang ti majak di Bintulu ba dagang pengkalan dia menua nya lalu diangkat nyadi pengkalan ti ketiga pemadu besai di Malaysia.

Entara serikat besai ti bisi ba Bintulu iya nya Petronas, MLNG enggau Pengkalan Industri Samalaju.

Kelimpah ari nya, Palan Belajar Tinggi Universiti Betanam Betupi Malaysia mega bisi di Bintulu ti kediatu dikumbai Universiti Putra Malysia ti nyadi palan belajar enggau servis betanam betupi pemadu manah ba renggat entarabansa.

Nyadi palan dagang temuai Bintulu ngembuan mayuh palan ti manah sereta narit ati baka Tiang Pengingat Dun, City Point (Mall), Pasar Besai enggau Tamu Bintulu, Pasar malam, Masjid Assyakirin, Tokong Kuan Yin Tong, Pantai Tanjung Batu, Taman Tumbina (Zoo), Padang Golf Kidurong, Taman Negara Similajau, Parkcity Mall (Mall), Bintulu Waterfront Promenade, Time Squre Mall, Bintulu paragon Mall, Bintulu central, Commercial centre Mall, Mardiah Beach Resort, Medan Mall Bintulu, Bintulu city Mall, Menara LNG, ABF Beach, Kidurong Central, Tiang pengkalan Kidurong, Kidurong Club, Taman Millenium Bintulu, Airport Bintulu enggau palan bukai.

Bida kelia enggau diatu Bintulu nyadi sebuah menua ti maju laban asil ari pengulih minyak enggau gis ti bisi dia ti ngasuh Bintulu terus mansang sereta nyungkak ekonomi Sarawak.

(Sumber: BHOnline (20 April 2016), Portal Rasmi Opis Bagi Menua Bintulu)

Suara Sarawak