ASADIA chakah ngidupka baru main asal Belikan

KUCHING: Sebengkah perengka muzik asal Iban ke dikumbai Belikan sempama udah mati tang mujur diidupka baru asil ari pengeransing Akademi Serakup Dayak Iban Sarawak (ASADIA).

Ketuai ASADIA, Mabong Unggang, 51 taun ngaku pekara tu bekau ari nya dia sida seraban dalam akademi tu udah muka kelas Belikan dikena ngidupka baru seni Belikan ngambika meruan dipeda nembiak rebak baru .

“Tu seriris amat enggau tuju lumur satu penumbuh ASADIA, deka ngidupka main asal enggau ngepan asal bansa (Iban enggau Dayak bukai) ti nyau majak punas.

“Belikan tu endang tulen main asal Iban ke udah lama dilengka.

BELIKAN SKRANG : Gamal Belikan ari Skrang, Betong ke diibun Tuan Rintai.

“Kepenudi dokumentari pasal Belikan digaga Tom Harrison ba taun 1958 iya nya urung 61 taun ke udah,” ku iya madah ngagai pemberita Ruai, Suara Sarawak.

Di Sarawak, perengka muzik ke nyau deka sebaka enggau gamal Sape tu diberi nama ke sebaka tang pendiau iya ditempa chukup bebida nitihka menua sereta pengelandik orang ke nempa.

Ambika chunto Belikan digaga ba menua Skrang dipeda lebih besai ba tengah tang kuchup mimit ba pun, ujung ia juring sereta bisi motif Dayak.

Bisi mega, perengka Belikan diayan ba Antique Shop belakang begunan Tun Jugah, Umur Belikan tu, kira 30 taun ke udah diibun tauke kedai nya empu.

Maya ditanya, tauke kedai nya madah Belikan nya ukai ungkup dijual seminaka pemandang,” ku Mabong ngelansa pejalai iya mansik seni Belikan di Sarawak.

BELIKAN SARATOK : Mabong (kiba) enggau Edmund Langu mandangka Belikan ari Saratok.

“Raban Iban tungga ke Saratok nyebut Belikan tu ‘Enyukan’,” ku iya.

Kelas Belikan ASADIA dipejalai ba ba Indu Opis SADIA di Kota Sentosa, ditu berengkah 27 Januari nyentuk 4 Mei 2019.

Kenu ku Mabong mega, pengajar ngajar kelas Belikan dikemataka penyanding penemu ASADIA Dato Seri Edmund Langu.

Pengawa mandangkan seni Belikan keterubah diperambu diatur kena 4 Mei 2019 bepalan ba Christian Ecunimical Centre, Jalai Stampin ditu.

Temuai dipebasa disadang datai bejadika pengerami tu ila Menteri Muda Nembiak enggau Lumba Datuk Snowdan Lawan.

ENDA DIJUAL : Siti Belikan ba Antique Shop di belakang Begunan Tun Jugah.

Tandu Mabong ke mega Pengajar ba SMK SMK Wira Penrissen, penumbuh ASADIA endang dikena ngerembaika main asal ngagai nembiak tauka raban rebak baru ngambi sida nampung sereta ngetanka main asal.

“Udah nya, nyungkak main asal ngagai tikas ti ulih nyadi industri ke ngerembaika penatai pemisi.

“Deka bekerejasama enggau perintah, NGO sereta semua orang ti mandangka main asal. Nyadi palan pelajar, ngajar enggau ngerembaika main asal.

“ASADIA mega deka ngerembaika dagang asil pengelandik jari enggau ti bukai,” ku iya nerang enggau nyemetak.

BARU ENGGAU LAMA : Entara Belikan ke bisi digumpul ASADIA dikena rebak baru belajar.
ENDA PUNAS : Mabong (duduk tengah) begambar kenang enggau bala pengajar sereta nembiak ti masuk kelas Belikan diatur ASADIA.
SIRUKA MAIN ASAL : Entara raban nembiak ti benung belajar main asal Belikan.
KELAS NINTING HARI : Kelas Belikan diajar serebak enggau kelas Sape kenyau 27 Jan nyentuk 4 Mei 2019.

Suara Sarawak