KUCHING: Akademi Serakup Dayak Iban Sarawak (ASADIA) ngemai 27 iku indu di Kota Sentosa, Kuching belajar ngaga Baju Kuas tauka Baju Kapuas.
Tuai ASADIA, Mabong Unggang madahka kelas tu sebagi ari pengawa sida deka ngangkat sereta ngerembaika pesaka Baju Kuas ti majak enda dikingat jeman diatu.
“Kelas Baju Kuas diatur kami dua renggat, renggat keterubah kena 16 enggau 17 November seraya renggat kedua diatur 14 enggau 15 Disember tu tadi.
“Renggat keterubah bisi 15 iku pelajar seraya renggat kedua bisi 12 iku pelajar,” ku iya dalam siti penerang media, kemari.
Tandu Mabong, Kelas Ngaga Baju Kuas tu diajar Pengajar Carolling Carol enggau Pengajar Elsie Joannes.
“Kami ngatur kelas tu ba palan ASADIA di Kota Sentosa, Kuching.
“Baju Kuas tauka Baju Kapuas tu endang udah nyadi ngepan Banda Iban ari pama kelia kelebih agi bansa Iban di pelilih menua Sebuyau ngagai menua Simanggang.
“Baju Kuas nya manding dikena begulai enggau ngepan asal kitai Iban,” ku iya.
Ku iya, Baju Kuas dijait ngena ubung emas sereta digaga ngena ukir nitihka pengelandik jari diri empu.
“Baju Kuas tu dikena baka kitai ngena tangu.
“Pengelandik ngaga Baju Kuas ukai semina ulih ngerembaika ngepan asal bansa tang mega ulih nulung nyungkak ekonomi raban indu ti deka bejual Baju Kuas,” ku iya.
