KUCHING: Dagang Rumah Asap Tabuan Dayak mega napi pemar baka dagang bukai sekumbang lima renggat Atur Tagang Pejalai (PKP) diteritka perintah kenyau ari 18 March nyin tadi.
Menijar iya, Jublin Derai madah, timpuh PKP nya ukai semina nanggul dagang dipejalai dia tang mega ngasuh pedagang enggau pengereja putus pengawa.
“Kami nemu perintah bejalaika PKP chara berenggat dikena nagang pengerekai igi penyakit Covid-19 ti benung nuntung menua.
“Atur tu diterima manah semua pedagang ditu ungkup pengelikun enggau pengelantang semua,” ku iya lebuh dirandau Suara Sarawak, apin lama ke udah.
Iya madah, taja atur bisi ditendu ba renggat kelima PKP iya nya timpuh penyuman, tang kami agi napi pemar laban sida ke ngusung endur nya agi kurang.
Tu berintik ari sekeda Atur Standard Pengawa (SOP) ti enda tau enda dititih semua piak sekumbang timpuh PKP diterit.
“Dalam timpuh PKPP tu, pedagang enggau pengereja ngasika atur jam bedagang ti ditetapka piak bekuasa, ari pukul 6 lemai nyentuk 10 malam.
“Ketegal bisi tatak jam bedagang tu ngujungka sida ke datai majak kurang lalu ngeruga dagang sida,” terang iya.
Kelimpah ari nya, taja pedagang bisi meri promosyen enggau pemakai ke baru dikena matak mensia mayuh tang inisiatif nya enda mujur.
“Enti dibanding asil diulih sebedau enggau pengudah PKP, tau dikumbai dagang kami kusut 45 peratus,” ku iya madah nyemetak.
