KUCHING: Kaunsil Pemansang Kraf Jari Malaysia Pampang Sarawak ngerikod asil lebih RM17 juta ba taun tu nyentuk bulan Oktober tu tadi.
Menteri Dagang Temuai, Industri Kreatif enggau Seni Pemerindang, Datuk Seri Abdul Karim Rahman Hamzah madah, pemujur nya ngujungka Sarawak ngelui tagit asil jual ti ditetapka opis menteri iya taun tu iya nya RM15.5 juta.
Ku iya, Industri Kraf Jari Malaysia balat kusut lebuh pandemik Covid-19 iya nya asil jual ba taun 2021 penyampau RM197.7 juta dibanding RM519.7 juta ba taun 2019 seraya ba taun 2022, RM211 juta asil jual dirikodka naka September tu tadi.
“Ba Sarawak, Kaunsil Pemansang Kraf Jari Malaysia Pampang Sarawak ngeripot asil jual ba taun 2019 iya nya RM31 juta dibanding RM15.7 juta ba taun 2021, urung 15 peratus nya asil jual online.
“Ba taun 2022, tagit bejual nya RM15.5 juta lalu naka bulan Oktober tu tadi, penyampau asil jual ngelui RM17 juta.
“Penyampau pemansut asil ti berejister mega udah nambah ari 951 ba taun 2019 enggau 1,143 ba taun 2022 tu,” terang iya.
Karim mansutka jaku nya lebuh nyimpul jurai opis menteri iya ba Aum Dun Sarawak tadi.
